Fransada keçirilən futbol üzrə Avropa çempionatının qalibi Almaniya komandası olacaq, İspaniya yığması 2-ci, Fransa isə 3-cü olacaq.

AzVision.az -ın məlumatına görə, «ACT Azərbaycan» araşdırma təşkilatının Bakıda keçirdiyi sorğunun nəticəsi bunu deməyə əsas verir.

Sorğu nəticələrindən belə qənaətə gəlmək olar ki, Bakı sakinlərinin 70%-I “AVRO-2016”-ın başlamasından xəbərdardır. 42% isə Çempionatın başlamasını bilsə də, oyunlara maraq göstərmir.

Amma oyunlara biganə qala bilməyən 14% Bakı sakini azərkeşlik etdiyi komandaların adını açıqlayıb.

Hansı ölkəyə azarkeşlik edirsiniz?

İlk iki pillədə Türkiyə (36%) və İspaniya (10%) qərarlaşıb. İtaliya (8%) və Almaniya (7%) demək olar ki, eyni pillədə yer alıblar.

Türkiyə yığmasına 70% kişilər və 30% qadınlar azərkeşlik edirlər. İspaniyada gender maraqları bərabər bölünüb – 50% qadınlar, 50% kişilər. İtaliya yığmasını dəstəkləyənlərin 82%-ni kişilər təşkil edir.

Portuqaliya yığmasını isə dəstəkləyənlərin 46%-ı qadınlardır. Almaniya yığmasını əsasən kişilər dəstəkləyir – 63%. Qəribə olsa da, kişilərin sevimlisi İtalya yığması qadınların ən az maraq çəkdiyi komandadır - 18%.

Hansı ölkə çempion olacaq?

Azərkeşlərinin sayının az olmasına baxmayaraq Almaniyanın qalib gələcəyini ehtimal edənlər (26%) daha çoxdur. İkinci göstərici İspaniyaya (11%), üçüncü isə Fransaya (6%) məxsusdur.

Ən yaxşı futbolçu

Bakı sakinləri portuqaliyalı Ronaldonun oyununu çox sevir və onun “AVRO-2016”-nın ən yaxşı oyunçusu seçiləcəyinə əmindirlər (12%). Çempionatın bombardiri adı da Ronaldoya yaraşdırılır (9%).

Oyunlara pul qoyan azdır

Oyunlara pul qoymaq futbolun ayrılmaz hissəsidir. Sorğuda iştirak etmiş 86% Bakı sakini son 6 ayda heç bir oyuna pul qoymadığını bildirib. 86% isə Avropa çempionatı zamanı heç bir komandanın xeyrinə pul qoymayacağını bildirib.

Ən sadiq azarkeşlər 45-54 yaşı olanlardır

Ümumilikdə isə sorğuda iştirak etmiş qadınların 6%-i, kişilərin isə 18%-i futbol maçlarını hər zaman izlədiklərini bildiriblər. 45-54 yaş qrupuna daxil sakinlər isə futbolun sadiq izləyiciləridirlər.

Anar Kəlbiyev
AzVision.az