Komitə rəsmisi bildirib ki, ailə-məişət zəminində baş verən zorakılıq hallarının azaldılması üçün ailə və uşaq psixoloqlarının sayı çoxaldılmalıdır.

“Məişət zorakılığına məruz qalmış qadınlara ilkin yardımın edilməsi vacib amillərdəndir. Qadın uşaqlarla təkbaşına qaldıqda və ya evdən qovulanda ona yardım edilə bilər. Həmin vətəndaş dövlət tərəfindən birdəfəlik müavinət alsa, bu, onun iş tapana qədər özünü reabilitasiya kursunu keçməsinə şərait yaradacaq. Həmçinin aliment fondunun yaradılması dövlət tərəfindən boşanma müddəti ərzində qadının təkbaşına uşaqları saxlamasına da kömək edəcək”.

E.Səfərov qeyd edib ki, aliment fondlarının yaradılması, imtiyazların, dəstək proqramlarının qəbul edilməsi qadın hüquqlarının müdafiəsində vacib addımlardan ola bilər.

“Komitə tərəfindən qəbul ediləcək yeni sənədlərdə bu müəddəalar nəzərdə tutulur. Ailə strategiyasında məişət zorakılığının qarşısının alınması üçün milli fəaliyyət planı, Uşaq Məcəlləsinin də qəbul edilməsi planlaşdırılır. Bu sənədlərdə qeyd etdiklərimizin hər biri öz əksini tapacaq”.

Aytən Zəhra
AzVision.az