Xaləddin İsgəndərov jurnalistləri təbrik edib

Xaləddin İsgəndərov jurnalistləri təbrik edib
  24 İyul 2013    Oxunub:1182
22 iyul Mətbuat günü münasibətilə Binədəqi rayon İcra Hakimiyyətində tədbir keçirilib.
İyul ayının 23-də Binəqədi Rayon İcra Hakimiyyətində Milli Mətbuat Günü münasibətilə tədbir keçirilib. AzVision.az xəbər verir ki, tədbirdə Binəqədi Rayon İcra Hakimiyyətinin başçısı Xaləddin İsgəndərov, Mətbuat Şurasının sədri Əflatun Amaşov, Azərbaycan Respublikasının Prezidenti Yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli, “AzərTAC”ın İctimai-siyasi redaksiyasının baş redaktoru Albina Atlıxanova, “İki Sahil” qəzetinin baş redaktoru Vüqar Rəhimzadə, “Səs” qəzetinin baş redaktoru Bəhruz Quliyev və digər mətbuat nümayəndələri iştirak edib.

Tədbir Ümummilli Lider Heydər Əliyevin Binəqədi Rayon İcra Hakimiyyətinin inzibati binasındakı büstünün önünə güllərin qoyulması və Ulu Öndərin xatirəsinin ehtiramla yad edilməsi ilə başlanmışdır. Tədbir iştirakçıları Binəqədi Rayon İcra Hakimiyyətində (RİH) yaradılmış 1646 – Sakinlərin Müraciət Xidməti ilə tanış olmuş və rayonda son bir ildə abadlıq-quruculuq, sosial-iqtisadi inkişaf sahəsində həyata keçirilmiş işlər və elektron hökumətin tətbiqindən bəhs edən filmə baxıblar.

Binəqədi Rayon İcra Hakimiyyətinin başçısı Xaləddin İsgəndərov çıxışında mətbuatın cəmiyyətin inkişafında rolundan danışmış, cəmiyyətin tərəqqisində hadisələri obyektiv işıqlandıran KİV nümayəndələrinin də rolunun olduğunu bildirmişdir. Ulu Öndər Heydər Əliyevin mətbuata göstərdiyi qayğıdan bəhs edən X.İsgəndərov 1998-ci ildə Ümummilli Lider tərəfindən mətbuat üzərindəki senzuranın ləğv edilməsi ilə milli mətbuatımızın inkişafına stimul yarandığını və möhtərəm Prezidentimiz İlham Əliyevin mətbuata daim diqqət və qayğı ilə yanaşdığını vurğulamışdır. Binəqədi RİH-in başçısı bu qayğıya bariz nümunə kimi 156 mətbuat nümayəndəsinin dövlət tərəfindən evlə təmin olunmasını göstərib. Daha sonra çıxış edən Ə.Amaşov, V.Səfərli və V.Rəhimzadə mətbuata dövlət qayğısından, Binəqədi rayonunda son bir ildə reallaşdırılan abadlıq-quruculuq işlərindən danışaraq bu işləri bir örnək kimi qeyd etmişlər.

Tədbirin gedişində “Binəqədi” qəzetinin təşkilatçılığı və “AzərTAC” ın İctimai-siyasi redaksiyasının baş redaktoru Albina Atlıxanova, “Səs” qəzetinin baş redaktoru Bəhruz Quliyev və “İki Sahil” qəzetinin baş redaktoru Vüqar Rəhimzadənin həmtəsisçiliyi ilə “Binəqədinin dostları” Mətbuat Klubunu təsis olunduğu elan edilib.

Tədbirin sonunda bir müddət əvvəl mətbuat nümayəndələri üçün elan olunan “Binəqədi rayonu mətbuatın gözü ilə” yazı müsabiqəsinin qalibləri təltif edilmiş, digər iştirakçılara isə həvəsləndirici mükafatlar və hədiyyələr təqdim olunub.



Teqlər:





Xəbər lenti