Diaspor fəalı Helsinki Komissiyasına bəyanat ünvanlayıb
Bəyanatda ABŞ ilə Azərbaycan arasında əməkdaşlıqda terrorizmə qarşı mübarizənin xüsusi yer tutduğu bildirilir: “Əfqanıstan, Kosovo, İraqda sülhyaratma proseslərində iştirak, təhlükəsizliyin təmin olunması istiqamətində terrorizmə, ekstremizmə qarşı birgə mübarizənin aparılması ölkələr arasındakı münasibətlərdə xüsusi yer tutur. Gündən-günə inkişaf edən Azərbaycan Cənubi Qafqaz regionunda aparıcı dövlətdir. 2001-ci ildə ABŞ-da baş verən 11 sentyabr hadisələri zamanı Azərbaycan qeyd-şərtsiz Birləşmiş Ştatlara dəstək verərək, beynəlxalq terrorizmə qarşı mübarizədə köməyini əsirgəməyib. ABŞ-Azərbaycan münasibətlərində digər mühüm məqam Ermənistan-Azərbaycan, Dağlıq Qarabağ münaqişəsi ilə bağlıdır. ABŞ ATƏT-in Minsk qrupunun həmsədrlərindən biri kimi münaqişənin həlli prosesinə yaxından cəlb olunub. Azərbaycan xalqı ABŞ-ın münaqişənin həllinə, sayı 1milyonu ötmüş qaçqın və məcburi köçkünün öz doğma yerlərinə qayıtmasına dəstək verəcəyinə inanır”.
Bəyanatda, həmçinin qeyd edilib ki, ABŞ-dakı bəzi qurumlar Azərbaycandakı inkişaf proseslərini görməzlikdən gəlir və müəyyən lobbist qruplar müvafiq hesabatlarla Azərbaycana qarşı qərəzli münasibət sərgiləyir ki, bu da Azərbaycan ictimaiyyəti tərəfindən müsbət qarşılanmır.
Bəyanatın sonunda 2018-ci il aprel seçkilərində İlham Əliyevin 86 faiz səs çoxluğu ilə Azərbaycan Respublikasının Prezidenti seçilməsi faktı diqqətə çatdırılıb. Məhz İlham Əliyevin rəhbərliyi altında milli maraqların müdafiəsinə əsaslanan siyasətin həyata keçirilməsinin Azərbaycanın xarici siyasətinin prioritet istiqaməti olduğu vurğulanıb. “Azərbaycan bütün dövlətlərlə qarşılıqlı hörmət, digərlərinin daxili işlərinə qarışmamaq və s. kimi prinsiplərə əsaslanan siyasət yürüdür. Bu yanaşmanın özü müsbət nəticələrə rəvac verir. Azərbaycanın xarici siyasəti müstəqildir”, - deyə bəyanatda qeyd edilib.
AzVision.az
Teqlər: ABŞ Diaspora Helsinki-Komissiyası