İvanovka ruslarından Prezidentə məktub

İvanovka ruslarından Prezidentə məktub
  18 May 2013    Oxunub:1082
İsmayıllı rayonunun İvanovka kəndinin sakinləri Azərbaycan Prezindenti İlham Əliyevə məktub yazıblar.

AzVision.az xəbər verir ki, bu barədə Prezidentin rəsmi saytında məlumat verilib. Məktubda deyilir:

Hörmətli cənab Prezident!

Biz, İsmayıllı rayonunun İvanovka kəndinin sakinləri, N.Nikitin adına kolxozun əməkçiləri Sizin rəhbərlik etdiyiniz ölkədə yaşamaqdan fərəh hissi keçirir, kəndimizin, rayonumuzun və doğma ölkəmizin rifahı naminə səylə çalışırıq. Siz 2005-ci ilin avqustunda İvanovkada olarkən demişdiniz: “Heydər Əliyev sizin qarantınız olmuşdur, bu gün isə mən sizin qarantınızam”.

Biz bunu həmişə hiss etmişik, son aylar isə daha çox hiss edirik. Rəhbərlik həyatın və təsərrüfat fəaliyyətinin bütün sahələrində bizə kömək edir. Kənd təsərrüfatı texnikasını, gübrə və kimyəvi maddələri ucuz qiymətlərlə alırıq. On beş çarpayılıq müasir xəstəxana istifadəyə hazırdır. Rayonun rəhbərləri İvanovkada keçirilən bütün tədbirlərdə iştirak edirlər.

Elə bir ümumrayon tədbiri yoxdur ki, orada İvanovka kəndinin və N.Nikitin adına kolxozun nümayəndələri iştirak etməsinlər.

Sizin milli siyasətiniz sayəsində İsmayıllı rayonunun bütün sakinləri milliyyətindən, dinindən asılı olmayaraq həmişə bir yerdədirlər, dövlətçilik mövqeyində yekdildirlər və bir-biri ilə sıx bağlıdırlar. Belə siyasət xalqımızın, bütün Azərbaycanın qüdrətidir.

Hörmətli cənab Prezident!

Biz ümummilli lider Heydər Əliyevin müqəddəs ruhu, sizin böyüklüyünüz qarşısında həmişə məsuliyyət hiss edirik və bu zəmində gündən-günə daha yaxşı işləyirik.

İvanovka və ivanovkalılar bizə xüsusi diqqət və qayğı ilə yanaşdığınıza, həmkəndlilərimizin həyatı ilə maraqlandığınıza, hər bir işdə kömək etdiyinizə görə Sizə minnətdardırlar. Siz həyatımızın, ulu öndərimiz Heydər Əliyev sayəsində qorunub saxlanmış rus kəndi İvanovkanın dayağısınız.

Bizim gələcək həyatımız, uşaqlarımızın və nəvələrimizin həyatı yalnız Sizin rəhbərliyinizlə bağlıdır. Allahdan Sizə möhkəm cansağlığı, uzun ömür və uzun illər Azərbaycana rəhbərlik etməyinizi arzulayırıq.

İvanovka kəndinin sakinləri adından böyük ehtiramla:

Qriqori Minnikov – N.Nikitin adına kolxozun sədri
Timofey Radayev – pensiyaçı, aqronom
Olqa Jabina – icra hakimiyyətinin İvanovka inzibati ərazi vahidi üzrə nümayəndəsi
Mixail Uryupin – Heydər Əliyev adına İvanovka tam orta məktəbinin direktoru
Pavel Kazakov - əmək veteranı, keçmiş tarla briqadiri

AzVision.az

Teqlər:  







Xəbər lenti