Ermənistan yeni AES tikəcək

Ermənistan yeni AES tikəcək
  05 İyul 2014    Oxunub:1436
Bu arada, Ermənistandakı `Metsamor` Atom Elektrik Stansiyası sentyabr ayında təmirə dayanacaq.

AzVision.az erməni mətbuatına istinadla xəbər verir ki, təmir müddəti 45 gün davam edəcək. Bu müddət ərzində AES yeni nüvə yanacağı ilə təmin olunacaq, bununla yanaşı profilaftik tədbirlər görüləcək, təhlükəsizlik tədbirləri gücləndiriləcək, deyə Ermənistanın Enerji Nazirliyi bəyanat yayıb.

Bu arada, Ermənistanın enerji naziri Yervand Zaxaryanın sözlərinə görə, AES-in xidmət müddətinin uzadılması ilə bağlı Rusiyadan 300 milyon dollar kredit alınması ilə bağlı danışıqlar yekunlaşmaq üzrədir.

Hazırda Ermənistanda daha bir AES-in tikilməsi üçün kredit ayırması ilə bağlı Rusiya ilə danışıqlar aparılır. Zaxaryanın sözlərinə görə, yeni stansiyanın inşasına 4.5 milyard dollar lazımdır. Bu vəsaitin yarısının Rusiya tərəfindən mal və avadanlıq qismində, qalanının isə digər ölkələrdən alınacaq maliyyə yardımı vasitəsi ilə ödəniləcəyi gözlənilir.

Qeyd edək ki, Ermənistandakı “Metsamor” Atom Elektrik Stansiyası dünyadakı ən təhlükəli stansiyalardan biridir. Ermənistanın paytaxtı İrəvandan təxminən 40 kilometr qərbdə (Metsamor şəhərində) yerləşən bu stansiyanın tikintisinə Sovet İttifaqı dövründə - 1973-cü ildə başlanılmış, 1979-cu ildə isə istismara verilmişdir. 1998-ci ildə Ermənistanda baş vermiş zəlzələnin mərkəzi “Metsamor” stansiyasından 75 kilometr aralıda idi. O zaman Sovet hakimiyyəti təhlükəsizlik sarıdan narahatlığa görə bu stansiyanın fəaliyyətini dayandırmışdı. Amma 1995-ci ildə ciddi enerji böhranı ilə üzləşən Ermənistan hökuməti beynəlxalq tənqidlərə baxmayaraq, stansiyanın işini bərpa etdi. Stansiyanın keçmiş baş direktoru Suren Azatyan müsahibələrindən birində hələ də “Metsamor”dan radioaktiv maddələr sızmadığına əmin olmadığını bildirmişdi. 1995-ci ildə Avropa və ABŞ tərəfindən “Metsamor” stansiyasının təhlükəsizlik standartlarının artırılmasına milyonlarla dollar vəsait xərclənib. Bununla belə, Avropa İttifaqı bu stansiyanı köhnə və az etibarlı olaraq qiymətləndirib.

Səbinə Həsənova


Teqlər:  





Xəbər lenti