Paşinyan nədənsə müsahibəsində Qarabağdakı erməni silahlıların çıxarılmaması, sərhəddə atəşkəsin ermənilər tərəfindən hər gün pozulması, Zəngəzur dəhlizinin açılması, sərhədlərin təyin edilməsinin və sülh sazişinin imzalanmasının yubadılması kimi məsələlərdən danışmır.

Əslində bu problemləri yaradan Ermənistan hökuməti son nəticədə növbəti dəfə “Dəmir Yumruq”la qarşılaşmanın yaxınlaşdığını hiss edir. Ermənistan ordusu isə nəinki müharibəyə, heç lokal toqquşmaya belə hazır deyil. Bunu Qarakilsədə, Ala göllərdə, Fərruxda və başqa yerlərdə yaxından müşahidə etdik. Müharibəyə hazır olmayan Ermənistanın atəşkəsi pozması isə İrəvana böyük fəlakətlər vəd edir.

İrəvan amerikalı səfiri təkzib etdi: "Azərbaycanla rəsmi əlaqəmiz yoxdur"

Azərbaycanın səbr kasasının dolduğu artıq sirr deyil. Ordumuzun cavab kimi həyata keçirəcəyi növbəti cəzalandırma əməliyyatları əvvəlkilərdən daha sərt və sürətli olacaq. Bu əməliyyatların “Ermənistanı birgə bəyanatlarda üzərinə götürdüyü öhdəlikləri yerinə yetirməyə məcbur etmək” kimi təsnifatlandırılması mümkündür.

Bu əməliyyatlar çərçivəsində keçən ilin avqustun 16-da Zəngəzur dəhlizinin açılması üçün Laçın-Qarakilsə-Görus-Şahbuz istiqamətində həyata keçirilən tədbirlər də davamı etdirilə bilər. İrəvanın vaxtı uzatması artıq mümkün görünmür. Ermənistan birgə Bəyanatın şərtlərini mütləq yerinə yetirəcək. Dəyişən sadəcə yerinə yetirlmənin metodu ola bilər.

Metod seçimi isə çox deyil: ya xoşluqla, ya da zorla. Azərbaycan istənilən ssenariyə və metod seçiminə hazırdır. Cəmiyyət Ermənistanın cəzalandırılmasının tərəfdarıdır. Elə mən özüm də “pilotsuz uçan erməni silahlıları”nın videoları üçün darıxmışam.

Ədalət Verdiyev, hərbi ekspert
AzVision.az