Ermənistan bəyanatların icrasına mane olur - XİN rəhbəri

  26 İyul 2021    Oxunub :546
 Ermənistan bəyanatların icrasına mane olur -  XİN rəhbəri
Azərbaycan, Rusiya prezidentləri və Ermənistanın baş naziri tərəfindən ötən il noyabrın 10-da və bu ilin yanvar ayının 11-də imzalanan üçtərəfli bəyanatların bir sıra müddəaları icra olunub, bəzi müddəalar icra olunur. Ermənistan tərəfindən sərgilənən qeyri-konstruktiv mövqe bu bəyanatların tam icrasına mane olur.
Azvision.az xəbər verir ki, bunu Azərbaycanın xarici işlər naziri Ceyhun Bayramov serbiyalı həmkarı Nikola Selakoviçlə birgə keçirdiyi mətbuat konfransında deyib.

Nazir Ermənistanın qeyri-konstruktiv mövqeyi ilə bağlı bir sıra məqamlara diqqət çəkib: “Olduqca vacib olan məqamlardan biri mina təhlükəsidir. Hərbi əməliyyatlar başa çatsa da minalar hərbi təhdidin davamıdır. Əgər hərbi əməliyyatlar başa çatıbsa, razılaşma əldə edilibsə, mina xəritələri də təqdim edilməlidir. Lakin Ermənistan tərəfi mina xəritələrini Azərbaycana təqdim etmir. Üçtərəfli bəyanat imzalanandan sonra altı ay müddətində Ermənistan minalanmış ərazilərin xəritələrinin olmasını inkar edirdi. Ancaq beynəlxalq təşkilatların da müdaxiləsindən sonra Ermənistan minalanmış ərazilərinin xəritələrinin bir qismini təqdim etdi. Nəyə görə bu 6 ay çəkdi? Nəyə görə qismən təqdim edildi? Nəticədə, 150-dən artıq insan həlak oldu, yaralandı”.

C.Bayramov bildirib ki, üçtərəfli bəyanatlarda vacib məqamlardan biri kommunikasiyaların açlmasıdır: “Bununla bu ilin yanvar ayında ayrıca üçtərəfli bəyanat imzalandı, işçi qrupu yaradıldı, bizdə hansısa ümidlər yarandı. Lakin Ermənistan hələ də bu məsələ ilə bağlı konstruktiv mövqe nümayiş etdirmir, hansısa zidd bəyanatlar verməklə prosesə zərbə vurur”.

Nazir əlavə edib ki, sərhədlərin delimitasiyası prosesində də Ermənistan konstruktiv mövqe nümayiş etdirmir.

"Bu destruktiv yanaşma prosesi pozan yanaşmadır. Bu gün əsas diskussiya üçtərəfli bəyanatların icrası olmalıdır. Lakin Ermənistan hansısa keçmişdə olan prinsipləri gündəmə gətirmək istəyir və qsa zamanda da ifşa olunur.
Münasibətlərin normallaşmanın qarşısını almaq, qəbuledilməz fikirlər səsləndirmək bölgədə sülh prosesini zədələyən hərəkətlərdir və bundan ən çox əziyyət çəkən Ermənistan özü olacaq. Ümid edirəm ki, Ermənistan bunu anlayacaq və biz konstruktiv addımlar görəcəyik”, - XİN rəhbəri vurğulayıb.

Azvision.az


Teqlər: CeyhunBayramov   Qarabağ  






Xəbər lenti