Malayziya parlamenti Ermənistanın təxribatlarını pislədi

  01 Oktyabr 2020    Oxunub : 2185
 Malayziya parlamenti Ermənistanın təxribatlarını pislədi
Malayziya Parlamentinin Nümayəndələr Palatasında Malayziya-Azərbaycan Parlamentlərarası Dostluq Qrupu tərəfindən Ermənistanın ölkəmizə qarşı davam edən hərbi təxribatını kəskin şəkildə pisləyən bəyanat verilib.
Azvision.az xəbər verir ki, bəyanat dostluq qrupunun sədri Datuk Rosman Bin Datuk Haji İsli tərəfindən imzalanıb.

“Biz, Malayziya Parlamentində Malayziya – Azərbaycan Dostluq Qrupunun üzvləri 27 sentyabr tarixində Ermənistan silahlı qüvvələri tərəfindən Azərbaycana qarşı başladılmış hücumları pisləyirik. Biz təcili olaraq Ermənistan hökumətinə çağırış edirik ki, beynəlxalq hüququn əsas əmredici qanunlarını (imperatives), eləcə də beynəlxalq humanitar sənədlərdən irəli gələn fundamental tələbləri pozan hər bir cəhdini dayandırsın. Ermənistan hökuməti gücdən istifadəyə baş vurmadan, eləcə də diplomatik səylərin gücünü nəzərə alaraq, Azərbaycanla münaqişənin sülh yolu ilə nizamlanmasına nail olmaq üçün ən qısa zamanda konstruktiv danışıqlara əməl etməlidir.

Bizim dostluq qrupumuzun bütün üzvləri dərin təəssüf hissi keçirirlər ki, Ermənistanın yuxarıda qeyd olunan hücumları təkcə Cənubi Qafqazda sülh və rifaha qarşı deyil, eyni zamanda 23 iyul 2020-ci il tarixində Malayziyanın BMT-yə üzv dövlətlərdən 171 ölkənin səsini toplayaraq, beynəlxalq əməkdaşlığı və qarşılıqlı etimadı nəzərdə tutan “COVID-19 Pandemiyası dövründə Qlobal Atəşkəs üçün BMT Baş Katibinin Müraciətinə Dəstək Bəyanatı” təşəbbüsünü də sarsmışdır".

Bəyanatın sonunda həyatını itirən şəxslərin ailələrinə başsağlığı verilir, yaralananlara şəfa arzulanır.

Qeyd edək ki, bundan əvvəl Malayziya Xarici İşlər Nazirliyi 29 sentyabr tarixində Azərbaycanın ərazi bütövlüyünə dəstək ifadə edən bəyanat yayıb.



Azvision.az

Teqlər: Malayziya