Fransa hökuməti “sarı jiletlilər”lə bacara bilmir

  18 Mart 2019    Oxunub : 1037
 Fransa hökuməti “sarı jiletlilər”lə bacara bilmir
Fransa hökumətinin mitinqlər zamanı özbaşınalığı və iğtişaşların qarşısını almaq üçün gördüyü tədbirlər yetərli olmayıb.

Azvision.az xəbər verir ki, bunu “sarı jiletlilər”in 16 martda keçirdikləri növbəti etiraz aksiyasına münasibətdə Fransanın baş naziri Eduard Filip bəyan edib.
“Ötən axşamkı (şənbə günü) hadisələrin analizi sübut edir ki, ölkədə zorakılığın və qanun pozuntularının qarşısının alınması üçün qəbul edilən tədbirlər yetərli olmadı”, – deyə Filip vurğulayıb.

Qeyd edək ki, “sarı jiletlilər” aksiyasının 30 mindən çox iştirakçısı martın 16-da paytaxt Paris və Fransanın digər əyalətlərində küçələrə çıxaraq sayca 18-ci etiraz aksiyası keçiriblər. Onlar bahalı mağazaların vitrinlərini dağıdıb, qəzet köşklərini, avtomobilləri və məşhur fransız restoranını yandırıblar. Polisin aksiya iştirakçılarına qarşı travmatik tapança, su şırnağı və gözyaşardıcı qaz tətbiq etməsi nəticəsində 60-dan çox etirazçı xəsarət alıb.

Fransa prezidenti Emmanuel Makron bildirib ki, “sarı jiletlilər”in etdikləri artıq aksiya çərçivəsindən kənara çıxır və etirazçıların məqsədi ölkəni məhv etməkdir.

Leyla Elbrusqızı
Azvision.az

Teqlər: Fransa   Etiraz   Aksiya