Komitənin “Könüllü ol” layihəsinə 1100-ə yaxın gənc cəlb edilib

Komitənin “Könüllü ol” layihəsinə 1100-ə yaxın gənc cəlb edilib
  14 Fevral 2019    Oxunub:2087
Azərbaycan Respublikasının Prezidenti cənab İlham Əliyevin rəhbərliyi ilə ölkə gənclərinin potensialının müasir dövrün tələblərinə uyğun inkişaf etdirilməsi, könüllülər hərəkatının ölkəmizin ictimai-siyasi həyatında yaxından iştirakı istiqamətində ardıcıl islahatlar aparılır.
Əmlak Məsələləri Dövlət Komitəsindən Azvision.az -a verilən məlumata görə, ölkə başçısının dövlət orqanlarının fəaliyyətində könüllülərin xidmətlərindən geniş istifadə edilməsi tapşırıqlarına uyğun olaraq Əmlak Məsələləri Dövlət Komitəsi tərəfindən müasir düşüncəli gənc könüllülərdən geniş istifadə edilməsi, gələcəkdə onların daimi iş yerləri ilə təmin olunması, institusional bacarıqlarının artırılması, intellektual inkişafı və asudə vaxtlarının səmərəli təşkili ilə bağlı geniş tədbirlər görülməkdədir. Könüllülərlə birgə iş birliyinin həyata keçirilməsi komitənin gənclər siyasəti sahəsində reallaşdırdığı tədbir və layihələrin, eləcə də əmlak idarəçiliyi sahəsində göstərilən dövlət xidmətlərinin tərkib hissəsidir.

Komitə qarşısında qoyduğu “Müasir düşüncə - gələcəyə addım” hədəfinə əsasən əmlak idarəçiliyi sahəsində “Könüllü ol” proqramı reallaşdırmaqdadır. “Könüllü ol” layihəsi çərçivəsində artıq 1100-ə yaxın könüllü komitənin fəaliyyət sferalarına aktiv şəkildə cəlb edilmişdir. Hər bir könüllü ilə komitədə fərdi görüşlər keçirilir, onların bilik və bacarıqları yoxlanılır. Nəticədə 320 könüllü komitənin müvafiq qurumlarında könüllü fəaliyyətə başlamışdır. Könülllü proqramında iştirak edən 110 nəfər könüllü komitənin müxtəlif qurumlarında işlə təmin ediliblər.

Respublikanın ali təhsil ocaqlarının tələbələri və məzunlarının da əmlak idarəçiliyi sahəsində könüllü fəaliyyətinə cəlb edilməsi istiqamətində fəal iş aparılır. Bu məqsədlə, Azərbaycan Dövlət İqtisad Universiteti, Bakı Mühəndislik Universiteti, Bakı Dövlət Universiteti, Azərbaycan Memarlıq və İnşaat Universitetində ümumilikdə 1000-ə yaxın məzun, tələbə və magistrlərlə ilə görüşlər keçirilib.

Respublikanın regionlarında da komitənin “Könüllü ol” proqramında iştirak etmək istəyən gənclərlə görüşlər keçirilir. Gəncə və Şirvan şəhərləri, Qəbələ, Quba regionunda yaşayan 700-ə yaxın gəncə “Əmlak Məsələləri Dövlət Komitəsində könüllü proqramı” mövzusunda seminarlar keçirilmişdir. Seminarlarda Əmlak Məsələləri Dövlət Komitəsinin fəaliyyəti, komitədə həyata keçirilən könüllü fəaliyyət haqqında məlumatlar verilmiş, suallar cavablandırılmışdır. Bu görüşlərdə könüllülük fəaliyyətinin həyata keçirilməsi üçün müraciətlər də qəbul edilib. Regionlarda belə görüşlərin mütəmadi olaraq keçirilməsi nəzərdə tutulub.

Konullülərlə birgə iş prinsipinin daha rahat və müasir formada qurulması məqsədi ilə 2017-ci ildən komitənin internet resursunda (https://azvision.az/redirect.php?url=http://www.e-emdk.gov.az:30034/Volunteer/FormApply) “Könüllü fəaliyyəti” adlı xüsusi bölmə də faəliyyət göstərir. Könüllü olmaq istəyən gənclərimiz “Könüllü ol” bölməsinə daxil olaraq müraciətlərini elektron formada da göndərə bilirlər. Könüllülər ilə 2-3 ay müddətinə müqavilə bağlanılır və könüllülük fəaliyyətinə başlanılır. Fəaliyyət müddətləri ərzində könüllülər üçün fərdi inkişafa hesablanmış müxtəlif təlimlər, seminarlar təşkil edilir. Onlar komitədə təcrübə keçir və təlimlərə cəlb edilirlər. Fəaliyyətlərini bitirən könüllülərə Əmlak Məsələləri Dövlət Komitəsinin rəsmi sertifikat verilir.

Komitə tərəfindən həyata keçirilən sosial layihələrdə və beynəlxalq tədbirlərdə də könüllülərin xidmətlərindən geniş istifadə edilir. Əmlak Məsələləri Dövlət Komitəsi, habelə digər dövlət qurumlarında da könüllülərin xidmətlərindən geniş şəkildə istifadə və gələcəkdə onların işlə təmin olunması nəticəsində gənclərin dövlətçilik ənənələri və vətənpərvərlik ruhunda yetişməsinə, sosial məsuliyyət hissinin güclənməsinə, yeni nəsil dövlət qulluqçularının formalaşmasına nail olunur.

Azvision.az


Teqlər: ƏMDK   Könüllü  





Xəbər lenti