Vüqar Həşimovun qardaşına “Microsoft”da yeni vəzifə verildi

Vüqar Həşimovun qardaşına “Microsoft”da yeni vəzifə verildi
  28 Noyabr 2017    Oxunub:9013
“Microsoft Azerbaijan” şirkətinin baş direktoru Sərxan Həşimov “Microsoft”un MDB üzrə İdarə Heyətinin üzvü seçilib. Sərxan Həşimov korporasiyanın biznesinin Türkmənistan və Tacikistanda inkişafı məsuliyyətini də üzərinə götürüb.
Bu barədə AzVision.az-a “Microsoft Azerbaijan” şirkətindən daxil olan məlumatda bildirilib.

Sərxanın əsas vəzifələri “Microsoft”un biznesinin Türkmənistan və Tacikistanda inkişafı, o cümlədən bulud texnologiyaları sahəsində, əsas tərəfdaşlar və sifarişçilərlə işgüzar əlaqələrin qorunub saxlanması, həmçinin dövlət orqanları ilə qarşılıqlı əməkdaşlığın inkişafı və nümayəndəliyin komandasına rəhbərlik etməsindən ibarətdir.

“Türkmənistan və Tacikistan bazarları bizim şirkətin bulud və mobil texnologiyaları, platforma həlləri və birgə iş üzrə vəsaitlər kimi prioritet istiqamətlərini uğurlu inkişaf etdirməsi üçün lazımi xüsusiyyətlərə malikdirlər. Əminəm ki, missiyamızı icra edərək – insanlara və təşkilatlara daha çox nailiyyət qazanmaqda yardım göstərərək biz ölkə iqtisadiyyatına və cəmiyyətin inkişafına öz töhfəmizi verə biləcəyik”, - deyə Sərxan Həşimov bildirib.

İKT sahəsində 13 il bundan öncə əmək fəaliyyətinə başlayan Sərxan Həşimov HP, “Oracle” və SAP kimi beynəlxalq şirkətlərdə çalışaraq karyera qurmağı bacarıb. O, iki il ərzində “Oracle” şirkətinin ən uğurlu əməkdaşlarından biri olub, SAP şirkətində isə o, 2015-ci ilin nəticələrinə əsasən, dünyanın ən yaxşı işçilərdən biri seçilib. Sərxan Həşimov irimiqyaslı layihələrin idarə edilməsi, konsaltinq xidmətlərinin təqdim olunması və biznesin inkişafı sahələrində geniş təcrübəyə, eyni zamanda, bulud texnologiyaları, mobil tətbiqlər və şirkətin resurslarının idarə edilməsi (ERP) sahələrində geniş biliyə malikdir.
Sərxan Həşimov evlidir, 9 yaşında bir oğlu var, asudə vaxtlarında peşəkar səviyyədə şahmatla məşğul olur.

Qeyd edək ki, Sərxan Həşimov Azərbaycanın şahmat tarixində ən yaxşı şahmatçı olmuş mərhum Vüqar Həşimovun böyük qardaşıdır.

Eldar Tanrıverdiyev
AzVision.az



Teqlər: Microsoft  





Xəbər lenti