Makron iranlı həmkarı ilə görüşəcək

Makron iranlı həmkarı ilə görüşəcək
  24 Sentyabr 2025    Oxunub:725
Fransa Prezidenti Emmanuel Makron bu gün iranlı həmkarı Məsud Pezeşkiyanla görüş keçirəcək.
Görüş ABŞ-nin Nyu-York şəhərində keçirilən Birləşmiş Millətlər Təşkilatının (BMT) Baş Assambleyası çərçivəsində baş tutacaq. Bu barədə Emmanuel Makron özü assambleya kürsüsündə çıxışı əsnasında məlumat verib. O diqqətə çatdırıb ki, Tehranın nüvə proqramına təzyiq məqsədilə BMT səviyyəsində nəzərdə tutulan sanksiyalar əsas müzakirə mövzusudur.

"Ya İran sülh və hesabatlılıq yoluna qayıdacaq, yaxud sanksiyalar qüvvəyə minəcək. Bu vacib məsələnin hər iki variantı üzrə qiymətləndirmə aparacağıq", – Fransa lideri söyləyib.
İran BMT-də nüvə məsələsini qaldıracaq

Xatırladaq ki, ötən günlərdə Birləşmiş Millətlər Təşkilatının (BMT) Təhlükəsizlik Şurası Tehrana qarşı sanksiyaları qiymətləndirərək, bu sanksiyaların qüvvədə qalmasına qərar verib. Eyni zamanda, Avropa İttifaqı (Aİ) da İrana BMT səviyyəsində sanksiyaların bərpası məqsədilə 30 günlük prosesə başlayıb.

Digər tərəfdən, İran ABŞ, (Aİ) və Beynəlxalq Atom Enerjisi Agentliyi (BAEA) ilə nüvə problemi üzrə gərginlik fonunda BMT-nin Baş Assambleyasında öz mövqeyini "aydınlaşdırmağa" hazırlaşır. Sentyabrın 17-də İranın Xarici İşlər Nazirliyinin mətbuat katibi İsmayıl Bəqayi diqqətə çatdırıb ki, Tehran Baş Assambleyanın müvafiq sessiyasında Avropa İttifaqı ilə anlaşılmazlıqları aradan qaldırmaq naminə danışıqlar aparacaq.

Firudin Həmidli
AzVision.az


Teqlər:   Fransa   İran   BMT   nüvə-danışıqları   sanksiyalar  



Xəbər lenti


Azvision.az ©2014 | Bütün hüquqları qorunur