Biləsuvarlı şəhid zabit və gizirlərin ailə üzvləri ilə görüş keçirilib

Biləsuvarlı şəhid zabit və gizirlərin ailə üzvləri ilə görüş keçirilib
  19 İyun 2021    Oxunub:1222
Azərbaycanın Milli Qəhrəmanı Mübariz İbrahimovun anım günündə Vətən müharibəsinin biləsuvarlı şəhid zabit və gizirlərinin ailə üzvləri ilə görüş keçirilib.
Bu barədə Azvision.az -a Müdafiə Nazirliyinin mətbuat xidmətindən məlumat verilib.

Müasir Azərbaycan Ordusunun qurucusu, xalqımızın ümummilli lideri Heydər Əliyev vaxtilə gənclərə müraciətində demişdi: “Vətənin, torpağın keşiyində daha cəsarətlə, daha mətinliklə durun. Vətəni qoruyun, xalq, Vətən sizin şücaətlərinizi layiqincə qiymətləndirəcək və heç vaxt unutmayacaqdır”.

Bu, həqiqətən də belədir. Yüzlərlə, minlərlə Azərbaycan gənci Ulu Öndərimizin bu arzusunu, bu öyüdünü də Vətənə sədaqətli xidmətləri ilə döyüş meydanlarında təsdiq edərək əbədiyyət zirvəsinə ucalıb, xidmətləri dövlət səviyyəsində yüksək qiymətləndirilib.

Vətənin undulmaz igidlərindən, Azərbaycan Ordusunun fədakar hərbi qulluqçularından biri də Azərbaycanın Milli Qəhrəmanı Mübariz İbrahimovdur. İndi o, həm ölkəmizdə, həm də Vətənimizin hüdudlarından kənarda qəhrəmanlıq, şücaət rəmzinə çevrilib.

Dövlətimizin başçısı, Ali Baş Komandan İlham Əliyev 2010-cu il noyabrın 7-də Silahlı Qüvvələrin Təlim və Tədris Mərkəzində qəhrəman döyüşçülərimiz Mübariz İbrahimov və Fərid Əhmədovla vida mərasimində qeyd edib ki, bizim ordumuzda minlərlə, on minlərlə Mübariz kimi, Fərid kimi qəhrəmanlar vardır. Onlar Ali Baş Komandanın əmrini gözləyirlər. Onlar öz doğma torpaqlarını azad etmək üçün hər an hazırdırlar.



Azərbaycan xalqı və Ordusu bu əmri düz on il səbirsizliklə gözlədi. Nəinki gözlədi, on il ərzində ordu quruculuğu məsələləri dövlətimizin başçısının fəaliyyətində prioritet oldu. Ordumuz yeni texnika, texnologiya, ən müasir silahlar, aviasiya vasitələri, raket-artilleriya qurğuları, ən müasir pilotsuz uçuş aparatları ilə daha da möhkəmləndirildi, yüksək döyüş qabiliyyətli, müharibələrdə qazanılan döyüş taktikasına yiyələnən peşəkar kadrlarla komplektləşdirildi. Xüsusi təyinatlı təhsil müəssisələri hərbi təhsilin ən yeni mərhələsinə qədəm qoydu. Nəhayət, gözlənilən günün gəlib çatdığı 2020-ci il sentyabrın 27-də Müzəffər Ali Baş Komandanımızın rəhbərliyi ilə xalqımız və Ordumuz Vətən müharibəsinə qalxaraq təcavüzkar Ermənistana dəmir yumruğunun gücünü göstərdi və 44 günlük Vətən müharibəsində düşmən üzərində möhtəşəm tarixi Zəfərə nail oldu.

İyunun 18-də Mübariz İbrahimovun təkbaşına döyüşərək düşmənlərə xeyli itki verdiyi və şəhid olduğu gün Müdafiə Nazirliyinin bir qrup hərbi qulluqçusu Biləsuvar rayonuna gedərək şəhid Milli Qəhrəman Mübariz İbrahimovun ata ocağını ziyarət edib, şəhidin valideynləri ilə görüşüb, bu yaxınlarda açılışı olacaq xatirə muzeyi ilə tanış olub, Vətənə layiqli oğul, Ordumuza mübariz döyüşçü bəxş etdikləri üçün İbrahimovlar ailəsinə minnətdarlıq ediblər.

Əməkdar incəsənət xadimi, Prezidentin fərdi təqaüdçüsü polkovnik Abdulla Qurbani Mübarizin davamçıları olan Vətən müharibəsi şəhidləri haqqında yazdığı “Vətən müharibəsi şəhidləri” silsiləsindən birinci kitabı qəhrəmanın atasına təqdim edib. Qəhrəmanın atası Ağakərim İbrahimov göstərilən diqqətə və xatirə kitabına görə Müdafiə Nazirliyinin rəhbərliyinə və müəllifə minnətdarlıq edib. Hər bir şəhidin Mübariz kimi ona doğma, əziz olduğunu, məhz bu şəhidlərin qanı hesabına, igidlərimizin şücaəti, xalqımızın birliyi, həmrəyliyi və əlbəttə, Müzəffər Ali Baş Komandanımızın polad iradəsi, dəmir yumruğu sayəsində möhtəşəm Zəfərə nail olduğumuzu iftixarla vurğulayıb.



Biləsuvar şəhərindəki Heydər Əliyev Mərkəzində Azərbaycan Ordusunun Vətən müharibəsində şəhidlik zirvəsinə ucalan biləsuvarlı şəhid zabit və gizirlərinin ailə üzvləri ilə görüş keçirilib. Əvvəlcə Birinci və İkinci Qarabağ müharibəsində şəhid olanların xatirəsi ehtiramla yad edilib.

Müdafiə Nazirliyinin rəhbərliyi adından tədbir iştirakçılarını salamlayan, şəhid hərbi qulluqçuların ailə üzvlərinə bir daha başsağlığı verən, onlara Vətənə layiqli övladlar yetişdirdiklərinə görə təşəkkürünü bildirən A.Qurbani kitabın nüsxələrini şəhidlərin doğmalarına təqdim edib.

Azərbaycan Respublikasının ərazi bütövlüyünün bərpasında xüsusi xidmətlərinə və işğal altındakı ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırıqlarını yerinə yetirərkən göstərdiyi qəhrəmanlıq nümunəsinə görə Azərbaycan Respublikası Prezidentinin Sərəncamı ilə ölümündən sonra “Vətən Müharibəsi Qəhrəmanı” adına layiq görülmüş şəhid polkovnik-leytenant Orxan Əkbərovun, şəhid kapitan Nihad Babayevin, şəhid kapitan Cavid Mahmudovun, “Qarabağ” ordenli şəhidlərdən kapitan Elçin Tağıyevin, gizir Məhəmməd Əmənovun ailə üzvləri çıxış edərək övladları ilə qürur duyduqlarını deyib və şəhid oğullarının xidmətlərinin yüksək qiymətləndirildiyinə görə Müzəffər Ali Baş Komandana ömürləri boyu minnətdar olacaqlarını ifadə ediblər.

Şəhid Elçin Tağıyevin azyaşlı qızı Dəryanurun şəhidlər haqqında söylədiyi şeir tədbir iştirakçılarına duyğulu anlar yaşadıb.

Biləsuvar Rayon İcra Hakimiyyətinin şöbə müdiri, Vətən müharibəsi qazisi Zamiq Mənsimov və Vətən Müharibəsi Veteranları İctimai Birliyinin Biləsuvar rayon şöbəsinin sədri, Birinci Qarabağ müharibəsinin veteranı Seymur Qurbanov ölkəmizin digər bölgələrində olduğu kimi, Biləsuvar rayonunda da bu gün hər bir vətəndaşın qələbə, zəfər əhvali-ruhiyyəsi ilə yaşadığını və hər an Müzəffər Ali Baş Komandanın əmrlərinə bir nəfər kimi hazır olduqlarını bildiriblər.

Əmək və Sosial Münasibətlər Akademiyasının məzunu, bir neçə gündən sonra müddətli həqiqi hərbi xidmətə yollanacaq İbrahim Quliyev rayon gəncləri adından çıxış edib və Azərbaycan Ordusunda şəhidlərimizin, igid Vətən əsgərlərinin qəhrəmanlıq ənənələrini layiqincə davam etdirəcəklərinə və şanlı hərb tariximizə yeni-yeni səhifələr yazacaqlarına and içib.



Azvision.az



Teqlər: Vətən-müharibəsi   Zabit   Şəhid  





Xəbər lenti