AMEA-nın magistraturasında tədris prosesi təkmilləşdirilir

  16 Oktyabr 2019    Oxunub : 903
AMEA-nın magistraturasında tədris prosesi təkmilləşdirilir
Bu gün Azərbaycan Milli Elmlər Akademiyasının Rəyasət Heyətinin iclası keçirilib. İclasda Akademiyanın magistraturasında tədris prosesinin təkmilləşdirilməsi barədə AMEA-nın akademik-katibi, AMEA-nın müxbir üzvü Əminağa Sadıqov çıxış edib.
Azvision.az xəbər verir ki, magistraturada tədris prosesinin təşkili və qarşıda duran vəzifələrdən danışan akademik-katib bu il AMEA-nın magistraturasına 22 ixtisas 75 ixtisaslaşma üzrə 120 nəfərin qəbul olunduğunu, keçən illə müqayisədə 2019-cu ildə bu rəqəmin iki dəfə artdığını diqqətə çatdırıb.

Tədris prosesinə cəlb olunan müəllimlərin AMEA-nın tanınmış alimləri sırasından seçildiyini deyən Ə.Sadıqov burada beş akademik, 19 müxbir üzv, 41-i professor olmaqla 66 elmlər doktoru və 101-i dosent olmaqla 127 fəlsəfə doktorunun dərs dediyini nəzərə çatdırıb.

Öz çıxışında 2019-cu ildən AMEA-da ödənişli magistr təhsilinə başlanıldığını xatırladan akademik-katib magistr hazırlığının 26 elmi tədqiqat institutu ilə aparıldığını qeyd edib.

Rəyasət Heyətinin iclasında AMEA-nın müxbir üzvü Əminağa Sadıqov institutlara tədris-metodiki sənədlərin, xüsusilə sillabusların tədris ili başlanana qədər hazırlanıb təsdiqlənməsi üçün müvafiq təhsil şöbələrinə vaxtında təqdim olunmasını tövsiyə edib.

Azvision.az

Teqlər: AMEA