Xocalı soyqırımı Şimali Kipr Parlamentində

  19 Fevral 2013    Oxunub : 466
Xocalı soyqırımı Şimali Kipr Parlamentində
TURSAM Strateji Araşdırmalar Mərkəzi 26 Fevral – Xocalı soyqırımının ildönümü ilə bağlı xarici ölkələrdə müxtəlif tədbirlər keçirmək barədə hazırlıqlara start verib.
AzVision.az-ın məlumatına görə, sosial şəbəkələrdə müxtəlif məzmunlu təbliğat posterləri yayan TURSAM Xocalı ilə bağlı ilk böyük tədbirini Şimali Kipr Türk Cümhuriyyətinin Parlamentində keçirəcək.

Fevralın 25-də səhər saatlarından başlayaraq ŞKTC Cümhuriyyət Məclisində “Xocalıya Ədalət” kampaniyası çərçivəsində sərgi-tədbir keçiriləcək. Şimali Kiprin millət vəkillərinin və mətbuat nümayəndələrinin iştirakı ilə baş tutacaq bu tədbir TURSAM-ın rəsmi tərəfdaşı olan Azərbaycan-Kipr Dostluq Cəmiyyətinin dəstəyi ilə keçirilir və tədbirdə Xocalı soyqırımını əks etdirən afişalar, fotolar, kitablar, bukletlər, filmlər və video çarxlar nümayiş olunacaq.
Növbəti tədbir isə 26 Fevral tarixində Şimali Kiprin paytaxtı Lefkoşa şəhərində keçiriləcək Qarabağ yürüşü olacaq. Bu yürüşdə də Xocalı ilə bağlı plakatlar nümayiş olunacaq. Şimali Kipr səfəri çərçivəsində TURSAM rəhbərliyinin bu ölkənin baş nazirlik, XİN və Parlamentində görüşləri nəzərdə tutulub.

TURSAM Strateji Araşdırmalar Mərkəzinin növbəti tədbiri 27 Fevral günü saat 15:00-da Türkiyənin Dənizli şəhərində Pamukkale Universitetində keçiriləcək. Pamukkale Universitetinin akt zalında baş tutacaq “Xocalıya Ədalət” tədbirində kitablar, fotolar, bukletlər paylanacaq, Xocalı ilə bağlı film nümayiş olunacaq.

Teqlər: