Reuters: "Tramp sülhə ümidini itirir"

09:12 02 Aprel 2025 Oxunub:586

Ağ Ev administrasiyasının yüksək vəzifəli rəsmiləri son günlər Vaşinqtonun yaxın bir neçə ay ərzində sülh razılaşmasına nail ola biləcəyi ehtimalını şübhə altına alıb.

AzVision.az xəbər verir ki, iki amerikalı məmura istinad edən “Reuters” agentliyinin yazdığına görə, Tramp administrasiyası Kiyevə və Moskvaya təzyiq göstərmək üçün yeni planlar hazırlayır.
İkinci prezidentlik dövrünün əvvəlində ABŞ prezidenti Donald Tramp və onun baş məsləhətçiləri aprel və ya may aylarına qədər tam atəşkəs əldə etməyi planlaşdırırdılar. Bundan sonra isə növbəti aylarda uzunmüddətli sülh sazişi imzalayacaqlarını gözləyirdilər.

"Lakin heç bir razılaşma qaçılmaz görünmür, vəziyyət müharibənin uzanması təhdidini və Kiyedin Qərbdən daha çox dəstək alması zərurətini yaradır”, - nəşrin həmsöhbətləri bildiriblər.

“Reuters” vurğulayır ki, müharibəni tez bir zamanda bitirəcəyini dəfələrlə vəd edən Amerika lideri üçün bu məqam bir lənətə çevilir. Belə ki, yüksək vəzifəli məmurlar son həftələrdə Kiyevin danışıqları necə aparmasından özəl qaydada şikayətlənsələr də, son günlər onlar Moskvanın davranışından daha çox məyus olublar.

Mənbələrin dediyinə görə, həftə sonu keçirilən bir sıra görüşlərdə və telefon danışıqlarında Ağ Ev və Dövlət departamentinin rəsmiləri etiraf ediblər ki, Rusiya prezidenti Vladimir Putin Vaşinqtonun uzunmüddətli sülh sazişi bağlamaq cəhdlərinə “aktiv müqavimət göstərir”. İndi onlar hansı iqtisadi və ya diplomatik sanksiyaların Moskvanı razılaşmaya sövq edə biləcəyini müzakirə edirlər.

- Tramp bu yaxınlarda rusiyalı həmkarına güvəndiyini və onun sülhə hazır olduğuna inandığını israr edib, lakin son günlər Ağ Ev Moskvanın niyyətindən ehtiyatlanıb. Hərçənd, Amerika lideri Rusiyanın münaqişəyə son qoymaq istədiyinə əminliyini söyləməkdə davam edir", - amerikalı məmurlar bildiriblər.

Yeri gəlmişkən, “The Washington Post (WP)” qəzetinin köşə yazarı Mark Tissenin də qənaətinə görə, Donald Tramp Rusiya prezidenti Putinin Ukraynada sülhün bərqərar olmasına maneçilik törətdiyi qərarına gəlsə, Moskvanı sanksiyalarla vuracaq və Kiyevə hərbi dəstəyi artıracaq. Eyni zamanda, ekspert Trampın Putindən daha güclü kartlara malik olduğunu iddia edir.

Sahil İsgəndərov
AzVision.az

Teqlər: Tramp sülh ümidlər