Azərbaycanlı pəhləvan qardaşlar Laçın və Hüseyn Pəhləvanoğlunun Amerikanın məşhur "America's Got Talent" şousundakı çıxışı sözün əsl mənasında amerikalıları şoka salıb. Qubalı 30 və 33 yaşlı pəhləvanların təhlükəli tryukları münsiflər heyətini heyrətləndirib.

Artıq iki gündür ki, qardaşların bu məharəti ölkə mətbuatında, sosial şəbəkələrdə geniş müzakirələrə səbəb olub.

Amerikalıları heyrətləndirən Hüseyn Pəhləvanoğlu AzVision.az-ın suallarını cavablandırıb:



-Pəhləvanlıq nədir? Hər adam pəhləvan ola bilərmi?

-Müxtəlif idman növləri ilə məşğul ola bilərsən. Amma pəhləvan ola bilməzsən. Məşq etməklə pəhləvan olmaq mümkün deyil. İnsanın gərək özündə pəhləvanlıq olsun. Bizim atamız Əli, əmimiz Qəmbər Dağıstanın xalq pəhləvanları olub. Biz atamızın adını daşıyan “Pəhləvan Əli” idman klubunun məşqçiləriyik.



-Neçə yaşınızdan bu işlə məşğul olursunuz?

-13 yaşımdan tədbirlərdə pəhləvan kimi çıxış edirəm. Qardaşım da mənimlə eyni vaxtda pəhləvanlığa başlayıb. Biz 3 qardaşıq. Üçümüz də pəhləvanıq. Qardaşımın biri Rusiyada yaşayır. Pəhləvanlıq bizim atamızın sənətidir. Biz onun yolunu davam etdiririk. Bu, həmiçinin Allahın bir vergisidir.



-Necə oldu ki, yolunuz Qubadan Amerikaya qədər uzandı?

-Biz hələ 2015-ci ildə Ukraynada istedad şousunda finala çıxmışdıq. Ukraynada çıxış etməyimizin səbəbi isə Gürcüstanda keçirilən Dünya Rekordlar Festivalındakı çıxışımız olmuşdu. Biz qardaşların adı Dünya Rekordlar Kitabına düşüb. Amerikada həmin yarışmanın təşkilatçıları bizim “Youtube”dəki çıxışımıza baxıb, bəyəniblər.

- Sizi Amerikaya kim dəvət etdi?

-Əvvəlcə biz şounun kastinq mərhələsi üçün video çəkib göndərdik. Kastinqdə gedib iştirak etmədik. Onlar göndərdiyimiz videonu bəyəndilər. Sonra bizə məktub göndərib, şouya dəvət etdilər. Bu dəvət əsasında biz Amerikaya getdik və birinci mərhələdə iştirak etdik.



-Azərbaycanlı olduğunuzu deyəndə ABŞ-da sizə necə münasibət göstərdilər?

-Bizi orada xoş qarşıladılar. Biz Azərbaycanın adı ilə çıxış edirdik. Çalışırdıq ki, ölkəmizi layiqincə təmsil edək. Bizə xarici ölkələrdən çoxlu təkliflər gəlirdi ki, onları yarışmada təmsil edək. Heç birini qəbul etmədik. İstəyirdik ki, öz ölkəmizi təmsil edək.

-Çıxışınız münfislər heyətini də qorxuya salımışdı...

-Biz birinci gün həmin nömrələri şifahi təqdim etdik. Bu, videodan da aydın görünür. Bəzi nömrələrimizi qorxulu olduğuna görə efirə vermədilər.

-Hansı nömrələrinizi efirə vermədilər?

-Göz və boğaz nahiyyəsində yük qaldırmaqla bağlı nömrələrimizi çəkdilər, amma qorxulu olduğuna görə efirə vermədilər.



-Nədən qorxudurdular ki?

-Münsiflər dedilər ki, bu nömrələr çox təhlükəlidir, ona görə də heç yerdə göstərilməsin. Həqiqətən də bizim elə nömrələrimiz var ki, 80 faiz ölüm riski daşıyır. Məsələn, bellə göstərilmiş nümayiş 85 faiz ölüm deməkdir.

-Sözün açığı, bellə göstərdiyiniz nömrə çox qorxulu idi. Bizə də maraqlıdır, necə ola bilər ki, bel sizin boğazınızı kəsmədi?

-Biz özümüz də səbəbini bilmədik ki, bel niyə boğazımızı kəsmədi. Həmin bel daxil olmaqla şouda istifadə olunan əşyalar əvvəlcə yoxlanılır, bundan sonra səhnəyə çıxarılır. Qeyd edim ki, şouda istifadə etdiyimiz belin ucu çox iti idi.

Bellə göstərdiyimiz nümunələr Dünya Rekordlər Kitabına düşüb. Bundan başqa qardaşımın başını mismara vurması da Rekordlar Kitabına düşüb.

-Kəsici belin boğazınızı kəsməməyinin sirri nədədir?

-Bunun böyük sirri yoxdur. Bizim elə nömrələrimiz var ki, bundan da qorxuludur. Həmin nömrələrin heç birini məşq etmirik. Biz təqdim etdiyimiz nömrələri ilk dəfə səhnədə nümayiş etdiririk. Bellə nömrəni də məşq etməmişdik.

Bir faktı qeyd edim. Çoxu inanmasa da, dərimi deşib yük daşıyıram. Qardaşım göz ilə maşını çəkir. Onları məşqdə göstərmirik. Yalnız səhnədə edirik.



-Deyirsiniz ki, həmin vaxt bel boğazınızı kəsə bilərdi...

-Biz nömrələri göstərən zaman heç vaxt elə şeylər haqda düşünmürük.

-Bəs ailəniz, övladlarınız həmin səhnələri görəndə qorxmurlar?

-Bizə ən böyük dəstəyi ailələrimiz verir. Tədbirlərdə onlar bizimlə birlikdə olurlar.

-Bir neçə gündür ki, hamı sizdən danışır. Sual edirlər ki, necə ola bilər, mismarlar qardaşınızın başına batmadı?

-Göstərdiyimiz nömrələr zamanı heç bir qoruyucu vasitədən istifadə etmirik.



- Çıxışlarınız zamanı ciddi xəsarət almısınızmı?

-Elə nörmələrimiz var ki, bədənimizdə hələ də izi qalıb.

-Sizcə, belə təhlükəli nümunələrdən sonra sağ qalmağınızın özü möcüzə deyilmi?

-Fikrimcə, bunlar möcüzədir. Münsiflər heyəti də dedi ki, bu nömrələri heç kim göstərə bilməz. Onlar bizə insan kimi yox, Allahın möcüzəsi kimi baxırdılar. Həmin nömrələrdən sonra bədənimizdə ciddi xəsarət və zədə olmadı. Bunlar adi insanın edə biləcəyi şeylər deyil.



-Çıxışınızdan sonra münsiflərdən sizə yaxınlaşan oldumu?

-Hamı bizə yaxınlaşırdı. Hətta münsiflər əlləri ilə bizim bədənimizə toxunurdular ki, görək, həqiqətən bunlar canlıdırlarmı. Toxunduqdan sonra deyirdilər ki, bunlar normal insandılar. Tamaşaçılar elə bilirlər ki, bütün azərbaycanlıllar bizim kimidir.

- Azərbaycanda özünüzə rəqib gördüyünüz pəhləvanlar varmı?

-Göstərdiyimiz bu nömrələrdə özümüzə heç kimi rəqib görmürük.



-Bildiyimizə görə, həmin verilişdə sizinlə yanaşı erməni iştirakçılar da olub. Onların sizə münasibəti necə idi?

-Ermənilər bizə paxıllıq edirdilər. Çünki, indiyə qədər heç bir erməni həmin səhnəyə çıxıb bizim nörmələrimizi təkrarlaya bilməyib.

- Amerikanın məşhur verilişinə çıxmaqla həyatınızda nə dəyişdi?

-Bizi rayonda hər kəs tanıyır. Artıq onlar bizə öyrəşiblər. Çünki, tez-tez onların qarşısında çıxışlar etmişik. Amma belə sensassiyaya səbəb olmamışdıq. İndi həqiqətən də sərhədləri aşdıq. Bütün dünya ölkələrindən bizə zənglər gəlir. Biz Amerikada özümüzü qubalı yox, azərbaycanlı qardaşlar kimi təqdim etdik. Bu, bizim üçün böyük uğurdur.

- Amerikaya geri qayıdacaqsınızmı?

-Hələ yarışma davam edir. Onlar özləri bizi dəvət edəcəklər.

-Yarışın qalibinə mükafat olaraq nə veriləcək?

-Müqavilənin şərtlərinə görə, yarış başa çatana kimi bunu açıqlaya bilmərik.



Amerikada qalıb, orada yaşamaq istərdiniz?

-Bunu gələcək göstərəcək.

-Bizdə olan məlumata görə, yarışda iştirak etmək üçün pul vermisiniz. Bu, doğrudurmu?

-Biz həmin yarışa öz maliyyəmizlə çıxmışıq. Bizə kənardan keç kim dəstək olmayıb. Bütün xərcləri öz cibimizdən ödəyirik.

-Bilmək olar, nə qədər pul xərcləmisiniz?

- Sadəcə olaraq deyə bilərəm ki, pulumuz çox çıxıb. Dəqiq məbləği açıqlaya bilmərik.



-Qubadan gedib Amerikanı “fəth etmək” necə bir hissdir?

-O hissi sözlə ifadə edə bilmirəm. Çox gözəl hissdir.

-Ölümdən qorxmursunuz?

-Niyə qorxmalıyıq ki? Hər an ölə bilərik. Hər halda ölümdən qorxsaydıq, belə nömrələri göstərməzdik.



Amerikanın rəsmiləri ilə görüşmək istərdinizmi? Məsələn, prezident Donald Trampla?

-Trampla görüşmək istərdik. Bunu kim istəməz ki?!



-İngilis dilini bilirsinizmi?

-Xeyr, bilmirik. Səhnədə olan zaman və səhnədən kənarda bizə deyilən sözləri başa düşmürdük. Bizim köməkçimiz, prodüsserimiz tərcümə edir. Səhnədə olanda görürdük ki, tamaşamçılar, müsiflər qışıqırıb nəisə deyirlər. Amma başa düşmürdük. Buna görə də İngilis dilini öyrənmək istəyirik.





Hafiz Əhmədov
AzVision.az