`Prezidentin çıxışı həddini aşan məmurlara mesajdır` - Deputat
Mən hər bir dövlət məmurunu təyin edəndə və ya icra başçısını başqa vəzifəyə qəbul edəndə də göstərişlər verirəm ki, get, insanlara qulluq elə, xidmət elə, dövlətə xidmət elə, təmiz işlə. Amma əfsuslar olsun ki, bəziləri nəticə çıxarmırlar və onların da cəzası verilir və veriləcəkdir. Biz bütün bu işləri görürük ki, Azərbaycanda inkişaf hərtərəfli və sürətli olsun, xoşagəlməz hallara son qoyulmalıdır".
Prezidentin çıxışına münasibət bildirən millət vəkili Fəzail İbrahimlinin sözlərinə görə, məmurların tənqid olunması insanlarda təəccüb doğurmamalıdır.
“Bəzən ölkədə prezidentin məmurları tənqid etməsi təəccüblə qarşılanır. Ancaq, belə olmamalıdır. Bu, dünya praktikasında qəbul olunmuş haldır. Əgər iş varsa, orada qüsur olur. Komanda varsa, ona irad da bildirilməlidir. Burada prezident öz komandasından səmimi olmağı, xalqa xidmət etməyi tələb edir. Ölkə başçısı komandasında olan məmurlara bununla mesaj verir.
Bu, həddindən artıq özündən razı olan, arxayın olan, atdığı addımların, əməllərin görünmədiyini düşünən, yaxud görünüb əhəmiyyət verilmədiyini düşünən məmurlara qarşı mesajdır ki, hər şeyi görürük, bilirik. Yerinizi, həddinizi bilin, səmimi olun, xalqa xidmət edin və göstərilən etimadı doğruldun”.
Deputat hesab edir ki, prezidentin çıxışı qeyd etdiyim işlərlə məşğul olan məmurlara şamil olunub: “Bu gün çətin, beynəlxalq hüququn beynəlxalq gücə təslim olduğu bir dövrdə yaşayırıq. Dünya yeni hüquq normalarının, prinsiplərinin müəyyən edilmə ərəfəsindədir. Ona görə də Azərbaycandakı komanda vahid, monolit, olduqca güclü olmalıdır. Bunun üçün ilk növbədə komanda üzvləri xalqa xidmət etməli, ruhunu duymalıdır. Qəbullarına gələn insanlara münasibətdə ədalətli olmalıdırlar”.
Elvin Abdulqədirov
AzVision.az