Prezident İlham Əliyevin cari ilin 15 iyul tarixində keçirilmiş 2022-ci ilin altı ayının yekunlarına həsr olunan müşavirədə çıxışı zamanı da qeyd etdiyi kimi, bütün istiqamətlər üzrə qarşıya qoyulmuş məqsədlərə uğurla çatılıb. Ayrıca olaraq, beynəlxalq münasibətlər və əməkdaşlıq sistemində Azərbaycanın iştirakı olduqca effektivdir.

Prezident beynəlxalq nüfuzumuzun artmasına işarə edərək, Qoşulmama Hərakatındakı uğurları xüsusi qeyd etdi. Bildiyimiz kimi, Azərbaycan 2019-cu ilin oktyabrında təşkilatın Bakıda keçirilən zirvə toplantısından sonra sədrliyi 2022-ci ilə qədər öz üzərinə götürmüşdü. Lakin Qoşulmama Hərakatına üzv dövlətlərin xahişi ilə Azərbaycanın sədrliyi 2023-cü ili də əhatə edəcək. Bu da təbii ki, Hərakat çərçivəsində Azərbaycanın səmərəli fəaliyyətinin göstəricisidir.

Ölkəmizin sədrliyi dövründə Bandunq prinsiplərinin dünyada tanıdılması, ümumiyyətlə, Qoşulmama Hərakatının qlobal məsələlərin həlli istiqamətindəki fəaliyyətində ciddi canlanma müşahidə olundu. Məhz Azərbaycan Respublikasının prezidenti cənab İlham Əliyevin təşəbbüsü ilə Hərakata üzv dövlətlərin təmas qrupunun toplantısı keçirildi. Xüsusi vurğulamaq lazımdır ki, Azərbaycan Prezidentinin təşəbbüsləri əsasında Qoşulmama Hərakatının institusional cəhətdən təkmilləşməsi də müşahidə olunmaqdadır. Məsələn, Hərəkatın Parlament Şəbəkəsinin Bakıda keçirilmiş toplantısı və Parlament Şəbəkəsinin yaradılması bariz nümunədir. Yəni, Azərbaycanın tərəfinin təşəbbüsləri Qoşulmama Hərəkatında həmrəyliyi gücləndirməyə, əməkdaşlığı daha da genişləndirməyə xidmət edir.

Azərbaycanla tərəfdaşları arasında əməkdaşlığın daim konstruktiv məcrada inkişaf etməsini şərtləndirən başlıca amil ölkəmizin malik olduğu böyük potensialla yanaşı, həm də sözü ilə əməlinin həmişə üst-üstə düşməsindən ibarətdir.

Prezident müşavirədə həm də Türk Dövlətləri Təşkilatında Azərbaycanın böyük fəallıq göstərməsini xatırlatdı. Bu platformada ölkəmiz müxtəlif istiqamətlərdə əməkdaşlığı təşviq edir və mövcud əməkdaşlıq sisteminin daha da inkişaf etməsi üçün ciddi fəaliyyət göstərir.

Eləcə də region dövlətlərlə uğurlu əməkdaşlıq qurmağımız da Prezident tərəfindən vurğulandı. Prezident beynəlxalq arenada uğurlu fəaliyyətin daxili siyasətə müsbət təsir etdiyini vurğuladı. Belə ki, cənab İlham Əliyev müşavirədə dedi: “Hər bir ölkəyə daxili siyasəti düzgün aparmaq üçün müsbət beynəlxalq fon lazımdır - ilk növbədə, qonşuluqda, digər tərəfdən də dünyada”.

Müşavirədən yadda qalan vacib məqamlardan biri də ondan ibarət oldu ki, Azərbaycan Prezidenti Ermənistana növbəti dəfə xəbərdarlıq edərək, status haqqında danışmağın təhlükəli olduğunu bildirdi. Ermənistan 10 noyabr 2020-ci ildə imzalanmış Bəyannamə ilə öz üzərinə öhdəliklər götürüb. Lakin bu öhdəlikləri yerinə yetirməkdən boyun qaçırır. Azərbaycan isə üzərinə götürdüyü öhdəliklərə həssas yanaşır. Məsələn, ölkəmiz Laçın dəhlizinin təhlükəsizliyinə zəmanət verir. Prezident Ermənistanın son dövrlərdə intensiv olaraq status məsələsini qabartmasının təhlükəli olduğunu bildirməklə, İrəvanı konstruktiv yola dəvət etdi.

Elşad Mirbəşiroğlu
Milli Məclisin deputatı