87 kiloqram çəki dərəcəsində yarışan idmançı final yolunda isveçrəli Ramon Betşartla üz-üzə gəlib. Rəqibini 6:1 hesabı ilə məğlub edən İ.Abbasov yarışın həlledici qarşılaşmasına vəsiqə qazanmaqla yanaşı, Tokio-2020 Yay Olimpiya Oyunlarına lisenziya da əldə edib.

Qeyd edək ki, bu, Azərbaycanın yunan-Roma güləşi üzrə ilk olimpiya lisenziyasıdır.

Digər təmsilçimiz Murad Məmmədov yarımfinalda Almaniya təmsilçisi Etienne Kinsinqerə uduzmaqla lisenziya şansını itirib.

İ.Abbasov qızıl medal uğrunda Gürcüstan güləşçisi Laşa Qobadze ilə qarşılaşacaq. M.Məmmədov isə Helari Maeqisalu (Estoniya) / İvan Lizatoviç (Xorvatiya) cütünün qalibi ilə "bürünc" görüşünə çıxacaq. 77 kq-da mübarizə aparan Sənan Süleymanov təsəlliverici görüşdə qüvvəsini sınayacaq. Onun rəqibi polşalı Mateuş Volni olacaq.

Xatırladaq ki, sərbəst güləş üzrə Azərbaycan millisi Avropa Olimpiya Təsnifat Turnirində 4 medal qazanıb. Kişilərin mübarizəsində Hacı Əliyev (65 kq) və Hacımurad Hacıyev (74 kq) gümüş, İslam Bazarqanov (57 kq) və Camaləddin Məhəmmədov (125 kq) isə bürünc medala yiyələnib. H.Əliyev və H.Hacıyev eyni zamanda Tokio-2020 Yay Olimpiya Oyunlarına lisenziya əldə edib.

Qadın güləşçilər lisenziyasız qalıb. Yalnız Tatyana Omelçenko (62 kq) bürünc medalla kifayətlənib.

Azvision.az