Füzuli aeroportunun faydası nə olacaq? - Region üçün yeni imkanlar açılır

 Füzuli aeroportunun faydası nə olacaq? -  Region üçün yeni imkanlar açılır
  16 Yanvar 2021    Oxunub:2469
Prezident İlham Əliyev Füzuli rayonunda hava limanının təməlini qoyub. Füzulidə beynəlxalq hava limanının inşası və yaxın gələcəkdə istifadəyə verilməsi işğaldan azad edilmiş ərazilərin inkişafı baxımından vacib layihələrdən hesab olunur.
Azvision.az xəbər verir ki, bunu Füzulinin deputatı, iqtisadçı alim Vüqar Bayramov deyib.

Onun sözlərinə görə, bu hava limanı işğaldan azad edilmiş ərazilərimizə xarici turistlərin gəlməsi baxımından yeni imkanlar yaradacaq:

"Nəzərə alsaq ki, Qarabağın incisi hesab olunan və Azərbaycanın mədəniyyət paytaxtı Şuşa şəhərinə gəlmək istəyən xarici turistlərin sayı kifayət qədər çoxdur. Füzulidə hava limanının tikilməsi imkan verəcək ki, həmin turistlər daha sərfəli və qısa yolla, praktik olaraq birbaşa işğaldan azad olunan ərazilərimizə səfər edə bilsinlər. Bu amil işğaldan azad edilmiş ərazilərimizə gələcək turistlərin sayına müsbət təsir göstərəcək və daha çox turistin ölkəmizə gəlməsinə imkan yaradacaq. Eyni zamanda hava limanı yükdaşımalar, xüsusən də beynəlxalq yükdaşımalar üçün vacib əhəmiyyət kəsb edir. İşğaldan azad edilmiş ərazilərimizin sənaye potensialını nəzərə alsaq, Füzulidə açılacaq hava limanı həmin ərazilərdə istehsal olunacaq sənaye məhsullarının dünya bazarına çıxarılması və bütövlükdə regionun ixrac imkanlarının genişləndirilməsi baxmından vacibdir".

Deputat qeyd edib ki, Füzuli rayonunda formalaşdırılacaq infrastruktur Azərbaycanın Qərb bölgəsi ilə Naxçıvan Muxtar Respublikasını birləşdirəcək nəqliyyat dəhlizinin bir elementinə çevriləcək:

"Bu dəhliz “Şərq-Qərb” beynəlxalq nəqliyyat dəhlizinə inteqrasiya olunacaq. Bu isə Füzuli rayonundakı hava limanının əhəmiyyətini daha da artıracaq. Hava limanının inşası eyni zamanda xarici investisiyanın cəlb edilməsi baxımdan da vacib hesab olunur və nəticədə Qarabağımıza daha çox sərmayənin yönəldilməsini müşahidə edəcəyik. Qarabağımız və bütövlükdə ölkəmiz üçün xeyirli və düşərli olsun!"

Azvision.az


Teqlər: Füzuli   Hava-limanı   Yol  





Xəbər lenti