“Ermənistanda baş verən hadisələr kənardan gülünc görünür” - Qriqori Trofimçuk

  15 Fevral 2020    Oxunub : 1664
“Ermənistanda baş verən hadisələr kənardan gülünc görünür” - Qriqori Trofimçuk
Ermənistanda Konstitusiya Məhkəməsi ətrafında baş verən hadisələr kənardan sadəcə cəfəng deyil, həm də gülünc görünür.

Azvision.az xəbər verir ki, bu barədə xarici siyasət, müdafiə və təhlükəsizlik sahəsi üzrə ekspert Qriqori Trofimçuk bildirib.
Onun sözlərinə görə, əsas problem Konstitusiya Məhkəməsində və onun rəhbərliyində deyil, baş nazir Nikol Paşinyan getdikcə guya ölkənin normal inkişafına maneə törədən daha çox hücum hədəfi axtarır.

"Amma görünür, bir çoxları bu yolda ən başlıca maneələrdən birinin köhnə “oğru” parlament olması və yeni seçkilərdən sonra insanların rahat nəfəs ala biləcəkləri barədə deyilənləri unudublar. Lakin yox, bu yolun sonsuz olduğu və relslərin heç bir yerə getmədiyi ortaya çıxdı. Bundan sadə bir nəticə çıxara bilərik ki, hətta 5 aprel referendumu Nikol Paşinyana lazım olduğu kimi keçirilsə də, bu, vətəndaşlara heç bir rahatlıq gətirməyəcəkdir. Hər halda, həyatın yaxşılaşdırılmasını Konstitusiya Məhkəməsi mövzusu ilə əlaqələndirmək bir qədər qəribədir. Konstitusiya Məhkəməsi qeyri-malların pərakəndə ticarəti ilə məşğul deyil", - deyə ekspert bildirib.

Onun sözlərinə görə, Konstitusiya Məhkəməsi ilə bağlı süjetdən sonra Ermənistanda hansı konkret quruluş və ya fiqurun günahkar adlandırılacağını düşünməyin vaxtı çatıb: "Və onlardan sonra kim gələcək. Bir yaxşı sovet komediyasında deyildiyi kimi: "Xahiş edirəm bütün siyahını elan edin!". Müttəfiq Ermənistanın daxili işlərinə qarışmayacaq rusiyalı ekspertləri yalnız bir sual maraqlandırır: qeyri-sabitlik onun daxilinə nə qədər keçə bilər və bu, bütün bölgəyə necə təsir edəcək? Erməni mediasını izlədikdə, bu ölkənin çox sayda ictimai-siyasi xadimləri aprelin 5-i ilə bağlı şərh verərkən, bunu dövlət çevrilişi adlandırırlar".

Trofimçuk hesab edir ki, bu, mövcud hökumətə qarşı bir qədər qəribə ittihamdır: "Axı, dövlət çevrilişi adlandırdıqları artıq 2018-ci ilin yazında baş verdi, buna görə də indi hamı eyni hüquqi xarakterə malik olan hadisələrin təbii nəticələrini müşahidə edir".

Pərvanə Sultanova
Azvision.az

Teqlər: Ekspert   Ermənistan   Paşinyan