Azvision.az xəbər verir ki, bunu Dağlıq Qarabağa səfər edən Minsk qrupunun rusiyalı həmsədri İqor Popov erməni jurnalistlərə açıqlamasında deyib. O bildirib ki, regiona səfərləri çərçivəsində əsir və girovların dəyişdirilməsi məsələsini müzakirə edirlər:

“Biz Azərbaycan və Ermənistan liderləri ilə bu ilin mart ayında Vyanada keçirilən görüşdə müzakirə edilən humanitar məsələlərlə bağlı öz yanaşmamızı təqdim etmişik. Keçirdiyimiz görüşlərdə xüsusilə, saxlanılan şəxslərin mübadiləsinin təşkili məsələsinə toxunulub. Bu mənada bir sıra ideyalarımız var, onların həyata keçirilməsi üzərində iş davam edir. Bu yaxınlarda biz Cenevrədə olduq, Beynəlxalq Qırmızı Xaç Komitəsinin sədri Peter Mauerlə görüşdük və bu mövzuda müzakirələr apardıq”.

Qeyd edək ki, Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyası tərəflərdə saxlanılan əsir-girovların “hamının-hamıya” prinsipi əsasında azad olunması və gələcəkdə əsir-girov götürülən şəxslərin, eyni zamanda meyitlərin 3 gündən gec olmayaraq qaytarılmasını aidiyyəti beynəlxalq təşkilatların vasitəçiliyi ilə 2016-cı ilin aprel ayında Ermənistan Respublikasına təklif edib.

Kəlbəcər girovları Dilqəm Əsgərov və Şahbaz Quliyevin Karen Kazaryan və Araik Kazaryan ilə mübadilə edilməsinə Azərbaycan tərəfinin hazır olması barədə Dövlət Komissiyası növbəti dəfə aidiyyəti beynəlxalq təşkilatlara 11 sentyabr 2019-cu il tarixdə rəsmi məlumat verib.

P.Sultanova
Azvision.az