Türkiyədən Səudiyyəyə qarşı daha bir ittiham

  08 Fevral 2019    Oxunub : 967
Türkiyədən Səudiyyəyə qarşı daha bir ittiham
“Jurnalist Camal Kaşoqinin qətli ilə bağlı aparılan istintaqda Səudiyyə Ərəbistanı rəsmilərinin şəffaflıqdan tamamilə uzaq olması olduqca narahatedicidir və onlara olan inama zərbə vurur”
Azvision.az xəbər verir ki, bunu Türkiyə prezidenti Rəcəb Tayyib Ərdoğanın köməkçisi Fəxrəddin Altun “Reuters”ə açıqlamasında deyib. Bildirib ki, səudiyyəli rəsmilərin bir sıra saxta təkzibləri Kaşoqinin cinayət işi ətrafındakı çox sayda problemlərlə bağlı qeyri-müəyyənlik yaradıb.

“Ötən 4 ay ərzində Səudiyyə rəsmiləri türkiyəli həmkarları və beynəlxalq ictimaiyyətlə münasibətlərində dürüst olmayıblar. Səudiyyə rəhbərliyi ədalət işinə xidmət etməyə hazır olduğunu sübut etmək üçün Kaşoqinin qatillərini əvvəlcədən planlaşdırılmış bu cinayəti törətdikləri ölkəyə - Türkiyəyə ekstradisiya etməlidir. Dünya bu işi izləyir. Türkiyə demokratiya və azadlığa inanan bütün xalqlarla birlikdə ədalət və həqiqət axtarır” - Ərdoğanın köməkçisi vurğulayıb.

Fəxrəddin Altun onu da xüsusilə bildirib ki, səudiyyəli müxalif jurnalist Camal Kaşoqinin qətli üzrə Türkiyənin apardığı istintaq zamanı əldə olunan nəticələr BMT-nin apardığı beynəlxalq təhqiqatın nəticələri ilə uyğunluq təşkil edir.

Qeyd edək ki, ötən gün BMT jurnalist Camal Kaşoqinin qətli ilə əlaqədar beynəlxalq araşdırmanın nəticələrini açıqlayıb. Hesabatda qeyd olunub ki, “Səudiyyə Ərəbistanının İstanbuldakı Baş Konsulluğunda törədilən Kaşoqi cinayəti səudiyyətli nümayəndələr tərəfindən planlı şəkildə həyata keçirilib. Səudiyyə Ərəbistanı qətlin araşdırılmasına ciddi cəhdlə mane olub.”

Türkiyə prezidenti Rəcəb Tayyib Ərdoğan Kaşoqinin qətlinə Səudiyyə kral ailəsinin yüksək vəzifəli şəxslərinin əmr verdiyini bildirmişdi. ABŞ Senatı isə Amerika kəşfiyyatının əldə etdiyi ciddi dəlillərə əsaslanaraq, Səudiyyənin vəliəhd şahzadəsi Məhəmməd bin Salmanı Kaşoqi qətlində birbaşa əli və cavabdeh olmaqda günahlandıran qətnamə qəbul edib. Lakin rəsmi Ər-Riyad ittihamları indiyədək rədd edir. Hazırda Səudiyyə rəhbərliyi qətldə şübhəli bilinən 21 nəfəri istintaqa cəlb edib. Onlardan yalnız 11-i həbs olunaraq məhkəmə qarşısına çıxarılıb və 5-nə edam cəzası istənilib.

Leyla Elbrusqızı
Azvision.az


Teqlər: Səudiyyə   Türkiyə   ABŞ   BMT