AzVision.az erməni KİV-lərinə istinadən xəbər verir ki, Paşinyan Moskvanın Ermənistan daxilində baş verən son siyasi proseslərdən narahatlığının əsassız olduğunu bildirib. Onun sözlərinə görə, Moskva Ermənistandakı dəyişikliklərə uyğunlaşmalıdır.

Rusiya xarici işlər naziri Sergey Lavrovun İrəvanın son günlərdə atdığı addımları tənqid etməsilə bağlı ən son bəyanatına dair şərh almaq istəyən jurnalistlərə açıqlamasında Paşinyan bəyan edib ki, “Ermənistanda artıq yeni vəziyyət yaranıb və biz hamımız, o cümlədən də, rusiyalı tərəfdaşlarımız bu yeni vəziyyətə adaptasiya olmalıdırlar. Odur ki, hər şey qaydasındadır.”

Xatırladaq ki, 2008-ci il martın 1-də Ermənistanda keçirilən etiraz aksiyalarının dağıdılması zamanı 10 nəfərin ölümü və ölkədə konstitusiya quruluşunu devirmək cəhdi ilə əlaqədar açılan cinayət işi çərçivəsində Ermənistanın keçmiş prezidenti Robert Koçaryan həbs edilib, KTMT-nin fəaliyyətda olan baş katibi Yuri Xaçaturova qarşı isə ittiham irəli sürülüb. Bununla əlaqədar Rusiya XİN rəhbəri Sergey Lavrov tənqidi bəyanat verib. O vurğulayıb ki, "Ermənistanda cərəyan edən hadisələr ölkənin yeni rəhbərliyinin siyasi sələflərini təqibə məruz qoymayacağına dair bəyanatları ilə ziddiyyət təşkil edir. Bir müttəfiq kimi Ermənistanda baş verənlər Moskvanı narahat edir və bu narahatlıq bir neçə dəfə Ermənistan rəhbərliyinin diqqətinə çatdırılıb."

Leyla Elbrusqızı
AzVision.az