“İndi onu səngərdə üşütmürmü qar, külək?!” – Hərbçi ailələri ilə həmrəylik VİDEOSU

“İndi onu səngərdə üşütmürmü qar, külək?!” – Hərbçi ailələri ilə həmrəylik VİDEOSU
  11 Yanvar 2018    Oxunub:76911
Qışın bu şaxtalı günlərində Orduda xidmət edən, Vətəni qoruyan hərbçilər və onların ailələrilə həmrəylik nümayiş etdirmək üçün AzVision komandası maraqlı bir layihə reallaşdırıb.
Redaksiyanın əməkdaşları şaxtalı gecədə əsgərlikdə olan atasının fikrini çəkən və gözünə yuxu getməyən bir körpədən bəhs edən məşhur ədəbi şedevri – Əhməd Cəmilin “Can nənə, bir nağıl de” şeirini ayrılıqda misra-misra oxuyub, sonra bir bütöv halında birləşdiriblər. Məqsəd soyuqda-şaxtada Vətəni qoruyan hərbçilərimizə və onların ailələrinə mənəvi dəstək olmaqdır.

Layihənin devizi kimi bu şüar seçilib: “Torpağı işğalda olan ölkədə hər bir ailə hərbçi ailəsidir!”





Əhməd Cəmil
“Can nənə, bir nağıl de”

- Ay nənə, bir nağıl da de!
- Ömrüm-günüm, yat daha,
Hamısını indi desəm, nağıl qalmaz sabaha.
- Can nənə, de birini də.
- Ağrın alım, sözə bax!
Evimizdə səndən savay, gör heç varmı bir oyaq?
Gecə keçib, ev soyuyub, hənir gəlmir ocaqdan
Taxt üstündə məstan pişik, odur, yatıb bayaqdan.
Ört üstünü, dərdin mənə, bax, eşikdə yel əsir…
- Qar yağırmı?
- Elə yağır… sazaq qılınctək kəsir…
Belə yağsa, qar sübhəcən yolu-izi örtəcək
Kirpiklərin lap qovuşub, cırtdan bala, yat görək.

Nənə yığır düyünçəyə iynəsini, sapını,
Külək hərdən taqqıldadır pəncərəni, qapını.
Körpə çəkir təzə, güllü yorğanını üzünə,
Gözlərini yumur… amma yuxu getmir gözünə.

- Ay nənə, o kimdir elə pəncərəni bərk vurur?
- Heç kim deyil, yat, ay bala, yeldir, qarı sovurur...
Bir gizilti duyur uşaq vücudunda bu ara,
Həsrət qonan gözlərini zilləyərək divara,
Çarpayının baş ucunda öz əliylə asdığı
Şəklə baxır, fikrə gedir, qucaqlayıb yastığı…

- Bəs ay nənə, atam indi haradadır, görəsən?!
- Bıy başıma nələr, oğul, yatmayıbsan hələ sən?!
- Axı, nənə, heç demirsən atam haçan gələcək,
İndi onu səngərdə üşütmürmü qar, külək?
- Ömrüm-günüm, körpə quzum, qurban olum adına,
Niyə köks ötürürsən o düşəndə yadına?
Atan yazır: hələ xoşdur bu tərəfdə havalar.
Deyir, oğlum darıxmasın, görüşərik bu bahar.
Bağçalarda çiçək açar gülöyşə nar, yasəmən,
Qaranquşla bir zamanda qayıdaram kəndə mən…
Heç darıxma, dərdin alım, atan gələr, o zaman
Sənə çoxlu nağıl deyər əsgərlikdən, davadan!
Di yat, indi gecə keçir…
- Onda, nənə, ay nənə!
Qoy kəsməyək ağ toğlunu, qalsın atam gələnə.
- Yaxşı, bala, qoy bağlarda çiçək açsın nar, ərik,
Sağlıq olsun, ağ toğlunu atan üçün kəsərik.
Mən eyvana xalı sallam, anan evi bəzəyər,
El qaydası süfrə açar, qohum-qonşumuz gələr.
Sən atanı qucaqlar, üz-gözündən öpərsən,
Qoca baban saz kökləyib, nağıl deyər sübhəcən…

Körpə güldü… həsrət qonan gözlərindən uçdü qəm,
Öpdü onun xəyalını indi özgə bir aləm;
Qaranquşlar uçub gəldi, açdı çiçək, güldü yaz…
Qucaqladı atasını, sonra kimsə çaldı saz…
Körpə özü hiss etmədən, onu yuxu apardı,
Çöldə isə bütün gecə külək tufan qopardı...



Teqlər: #Vətənpərvərlik   #Ordu   #Əsgər   #Hərbçi   #Hərbçiailələri  





Xəbər lenti