BŞDYPİ-nin ictimaiyyətlə əlaqələr şöbəsinin rəisi Vaqif Əsədov AzVision.az-a bildirib ki, reydlər çərçivəsində ötən həftə təkcə "Ekologiya postu"nda 121 sürücüyə protokol tərtib edilib.

DYP rəsmisi qeyd edib ki, protokollar əsasən istismar müddəti bitmiş avtomobillərin sürücülərinə yazılıb.

“Xüsusilə, Sovet istehsalı olan maşınlarda mühərrikin işlək vəziyyətdə buraxdığı dəm qazının həcmində daha çox zərərli maddələr var. Bu gün Azərbaycanda “Avro 5” standartı tətbiq edildiyindən sərhəddə ölkəyə gətirilən nəqliyyat vasitələrinin mühərriklərinin vəziyyətinə baxılır. Bu cəhətdən xarici istehsal olan avtomobillərdə problem az olur. Çünki “Avro 5” standartlarına cavab verməyən avtomobillər ölkəyə buraxılmır. Hesab edirəm ki, bu doğru addımdır”

V.Əsədovun sözlərinə görə, reydlər zamanı “İkarus” avtobusları, "Zil", "KAMAZ" "Tofaş", "QAZ -24", "QAZ -31", 1991-1993-ci illərdə istehsal olunan “BMW” və “Mercedes” modellərində də nöqsanlar aşkar edilib.

Qeyd edək ki, reyd avqustun 1-dən başlayaraq avqustun 31-dək davam edəcək. Reyd zamanı "Ekologiya postu" kimi tanınan ərazidə hərəkətdə olan bütün növ nəqliyyat vasitələri polis əməkdaşları tərəfindən saxlanılır və bir-bir yoxlanılır.

Aytən Zəhra
AzVision.az