Bu barədə AzVision.az-a Ekologiya və Təbii Sərvətlər Nazirliyinin (ETSN) Ətraf mühitin mühafizəsi departamentinin sektor müdiri Raqub Mirzəyev bildirib. Onun sözlərinə görə, araşdırma zamanı həmin ərazidə "A-3 Sənaye Tikinti Korporasiyası" MMC tərəfindən söküntü və tikinti işlərinin aparıldığı müəyyən olunub.

“Araşdırma zamanı məlum olub ki, Bakı Şəhər İcra Hakimiyyətinin (BŞİH) müvafiq sərəncamı əsasında həmin ərazidə tikinti aparılması üçün torpaq sahəsi ayrılıb. Bu zaman yaşıllığın mövcudluğu nəzərə alınmayıb və Ekologiya və Təbii Sərvətlər Nazirliyindən qanunvericliyə uyğun olaraq heç bir icazə sənədi olmadan tikintiyə başlanılıb”.

R.Mirzəyev bildirib ki, bu səbəbdən "A-3 Sənaye Tikinti Korporasiyası" MMC barəsində akt və protokol tərtib edilib və ağacların məhv edilməsinə görə təbiətə 80 760 manat məbləğində ziyan vurulduğu müəyyənləşib.

“Eyni zamanda, həmin MMC İnzibati Xətalar Məcəlləsinin bir neçə maddəsi əsasında 50 min manatadək cərimə edilib. Vurulan ziyan cinayət tərkibi yaratdığından aidiyyəti üzrə hüquq mühafizə və məhkəmə orqanlarına müraciət edilib. Həmin MMC-yə ümumilikdə 130 760 manat cərimə kəsilib. Bundan əlavə ərazidə 27 ağacın qorunması üçün şirkətə məcburi göstəriş verilib və ərazi nəzarətə götürülüb. Hazırda söküntü və tikinti işləri həyata keçirilmir. Ərazinin torpaq mülkiyyətçisi Bakı Şəhər İcra hakimiyyətinin səlahiyyətindədir, istintaq tədbirlərindən sonra orada bərpa işləri həyata keçiriləcək”.

Qeyd edək ki, Prezident İlham Əliyevin göstərişi ilə Yasamal rayonu, Mətbuat prospektində yerləşən "Ovçular evi" ərazisində yaşayış binasının tikintisi dayandırılıb. Buna səbəb tikinti aparan şirkət tərəfindən ərazidəki 54 ağacın qanunsuz olaraq kəsilməsi və ərazidəki yaşıllığın tamamilə məhv edilməsidir.

Aytən Zəhra
AzVision.az