Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin publik data portalı nın təqdimatı və “Dövlət idarəetməsində data əsaslı qərar qəbuletmə” mövzusunda panel müzakirələr keçirilib.

Tədbirdə müxtəlif dövlət qurumlarının və texnoloji şirkətlərin, ali təhsil müəssisələrinin müvafiq sahə üzrə fəaliyyət göstərən nümayəndələri iştirak ediblər. Dövlət Agentliyinin sədri Ülvi Mehdiyev çıxışında dövlət idarəçiliyinin səmərəliliyinin artırılmasında data əsaslı qərar qəbuletmə mexanizmlərinin tətbiqinin əhəmiyyətini vurğulayıb, “ASAN xidmət”in bu istiqamətdə gördüyü işlərdən danışıb. Həmçinin müvafiq istiqamətdə qlobal dünyada yeni texnologiyaların, o cümlədən süni intellekt həllərinin vacibliyi diqqətə çatdırılıb.

Bildirilib ki, portalın məqsədi Agentliyin müxtəlif istiqamətlər üzrə fəaliyyətində vətəndaş iştirakçılığının təşviqi, eləcə də bu çərçivədə hesabatlılığın təminidir. Portal “ASAN xidmət”in müxtəlif istiqamətlərdə, o cümlədən beynəlxalq sferadakı fəaliyyəti, Dövlət Xidmətlərinin Elektron Reyestri, “ASAN Viza”, “ASAN ödəniş”, “ASAN müraciət” sistemləri, “YAŞAT” Fondu ilə bağlı məlumatları əhatə edir. Tədqiqatçılar və biznes iştirakçıları təqdim olunan datalardan istifadə etməklə fərqli çağırışlara yönəlik yeni innovativ həllər irəli sürə bilərlər.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev bildirib ki, “ASAN xidmət” dövlət xidmətləri sahəsində müasir texnologiyaların, innovasiyaların tətbiqini həyata keçirən bir qurumdur və süni intellekt həlləri vasitəsilə vətəndaş məmnunluğunun daim 100 faizə yaxın olmasını hədəfləyir:

“ASAN xidmət”in fəaliyyətdə olduğu 12 il ərzində xidmətin fəaliyyəti zamanı toplanan məlumatların cəmiyyət üçün açıq ola bilməsi də əsas hədəflərdən biri idi. Təqdimatı edilən publik data portalından cəmiyyətin müxtəlif təbəqələri öz şəxsi, biznes məqsədləri, elmi araşdırmaları üçün istifadə edə, yeni məhsul və xidmətlər yarada biləcək. Portal bu gün istifadəyə verildi. “ASAN xidmət”in rəsmi internet səhifəsində həmin portala keçid var. Buna maraqlı olan hər kəsi istifadə etməyə dəvət edirik.

“ASAN xidmət”də bir neçə süni intellekt həlləri tətbiq edilir. Əsasən vətəndaş axınının idarə edilməsi, rəy sorğularının təhlili, data əsaslı qərar qəbul edilməsi üçün bir neçə süni intellekt həlləri tətbiq olunur və bu, davamlı olacaq”, - deyə Ü.Mehdiyev qeyd edib.

Tədbirin yekununda isə “Data əsaslı qərarvermə: mif, yoxsa reallıq?” mövzusunda panel müzakirələr baş tutub. Müzakirələrdə dövlət qurumlarının süni intellekt həllərinin tətbiqi ilə bağlı təcrübələri bölüşülüb.

AzVision.az

Qalereya