Müəllif yazıb ki, hazırda proseslər əslində Kremlin xeyrinə cərəyan edir.

Tramp: “Putin və Zelenski sazişə hazırdırlar”

"Analitiklər deyirlər ki, ABŞ-nin müzakirələr aparan rəsmiləri Ukrayna müharibəsi ilə bağlı danışıqlarda ruslara uduzurlar. Tramp administrasiyası iki dəfə bəyan edib ki, sülh danışıqlarında əhəmiyyətli irəliləyiş əldə edilib. Bura enerji infrastrukturu mövzusu və Qara dənizdə qismən atəşkəsə nail olunması daxildir. Lakin sonradan tərəflər bu razılaşmaları əhəmiyyətli dərəcədə fərqli şərhlərlə təqdim etdilər və döyüşlər hələ də davam edir", -qəzet yazıb.

Müəllif xatırladıb ki, əvvəlcə Ukrayna və ABŞ təkcə səngərlərdə deyil, bütün mülki infrastrukturda atəşkəsdən danışırdılar. Rusiya isə bu razışlamanın yalnız enerji infrastrukturuna aid olduğunu iddia edirdi: "Hər iki halda tərəflər bir-birini müqaviləni pozmaqda ittiham edib".

Prezident Tramp isə mövcud durumu belə şərh edib: "Rusiya və Ukrayna bizimlə uğurlu əməkdaşlıq edir. Amma biz bunu dayandırmalıyıq".

Bu, Trampın 24 saat ərzində həll edəcəyinə söz verdiyi bir münaqişədir. Lakin görünən odur ki, hər şey Ağ Evin planına uyğun getməyəcək. Danışıqların faktiki nəticələri əslində sülh prosesinə və amerikalı vasitəçilərin qərəzsizliyinə inamı əhəmiyyətli dərəcədə sarsıdıb.

Buş administrasiyasının Milli Təhlükəsizlik Şurasının Rusiya məsələləri üzrə baş direktoru olmuş Tomas Qrem də mövzu ətrafında danışıb. O, deyib: "Düşünürəm ki, hazırki çabalar sadəcə Tramp administrasiyasının uğur və inkişaf nümayiş etdirməyə və gələcək problemləri gizlətməyə çox həvəsli olduğunu göstərir".

Cenevrə Təhlükəsizlik Siyasəti Mərkəzinin direktoru Tomas Qreminger isə yersiz güzəştlərdən gileylənib: "Biz prezident Trampın və ABŞ hökumətinin digər üzvlərinin müntəzəm şəkildə və ictimaiyyət qarşısında güzəştlərə getdiyini gördük. Belə davranışlar adətən danışıqlardan əvvəlki prosesdə atılması məqbul olan bir addım sayılmır".

Rusiya ilə Ukrayna arasındakı genişmiqyaslı müharibə 2022-ci ilin fevralın 24-də başlayıb. Moskva işğal zamanı qoşunları Kiyevə qədər apara bilsə də, sonradan müharibədə üstünlük nisbətən Ukraynanın tərəfinə keçdi. Ukrayna qoşunları ötən ilin iyunundan əks-hücum əməliyyatlarına başladılar. Amma bu da uğurlu olmadı. Ukrayna ordusu 2024-cü ildə gözlənilmədən Rusiyanın Kursk vilayətinə girdi. Son aylarda isə Rusiya yenidən döyüş meydanındakı vəziyyəti öz xeyrinə dəyişə bilib. Kurskun işğalda qalmış əraziləri yenidən geri qaytarılıb.

Tural Tağıyev
AzVision.az