Tramp Avropanın ABŞ-dən daha çox silah almasını tələb edir

Tramp Avropanın ABŞ-dən daha çox silah almasını tələb edir
  11 Fevral 2025    Oxunub:396
Ağ Ev administrasiyası avropalı müttəfiqlərini Ukraynaya ötürmək üçün Amerika silahlarının alışını artırmağa sövq etməyi planlaşdırır. Bu, Kiyevin Rusiya ilə mümkün sülh danışıqlarında mövqeyini yaxşılaşdıra biləcək bir addım olardı.
AzVision.az xəbər verir ki, iki məlumatlı mənbəyə istinad edən “Reuters” agentliyinin yazdığına görə, ABŞ rəsmiləri, o cümlədən Trampın Rusiya və Ukrayna üzrə xüsusi nümayəndəsi Kit Kelloq 14-16 fevralda keçiriləcək Münhen Təhlükəsizlik Konfransı (MSC) zamanı bu planı avropalılarla müzakirə edəcək.

“Bu, Tramp administrasiyası tərəfindən Amerika kapitalını əhəmiyyətli dərəcədə xərcləmədən Kiyevə ABŞ istehsalı olan silahların tədarükünü davam etdirmək üçün nəzərdə tutulan bir neçə ideyadan biridir”, - agentlik bildirib.

ABŞ Ukraynada sülh planı üzərində işi dayandırıb
Agentliyə müsahibəsində bu planın mövcudluğunu təsdiqləməkdən imtina edən Kit Kelloq vurğulayıb ki, ABŞ öz iqtisadiyyatını gücləndirən Amerika istehsalı olan silahları həmişə satmaq istəyib. Kelloq onu da diqqətə çatdırıb ki, Kiyev Amerika silahlarını silahları almaqda davam edir. Onların göndərilməsi Trampın sələfi Co Bayden tərəfindən təsdiqlənib.

Bundan əvvəl ABŞ prezidentinin Rusiya və Ukrayna üzrə xüsusi nümayəndəsinin fevralın 20-də Kiyevə səfər edə biləcəyi barədə məlumat yayılıb. Bir neçə gün əvvəl isə, Donald Tramp ukraynalı həmkarı Volodimir Zelenski ilə “ehtimal olunan” görüşündən danışıb. Amma bu görüşün vədəsini dəqiqləşdirməyib.

Sahil İsgəndərov
AzVision.az


Teqlər:   ABŞ   Avropa   silah  





Xəbər lenti


Azvision.az ©2014 | Bütün hüquqları qorunur