"Səfirliyimizə hücuma görə İran dövləti də məsuliyyət daşıyır" - Deputat

   "Səfirliyimizə hücuma görə İran dövləti də məsuliyyət daşıyır" -    Deputat
  27 Yanvar 2023    Oxunub:1116
Xəbər verdiyimiz kimi bu gün Bakı vaxtı ilə səhər saat 8:30 radələrində Azərbaycanın İran İslam Respublikasındakı Səfirliyinə silahlı hücum olub.
Hücum edən şəxs kalaşnikov markalı avtomat silahla mühafizə postunu yararaq, mühafizə xidmətinin rəisini qətlə yetirib. Səfirliyin iki nəfər mühafizə əməkdaşı da hücumun qarşısını alarkən yaralanıblar. Hazırda bu xain hücum üzrə araşdırma gedir.

İrandakı qalmaqallı xain hücumu AzVision.az -a şərh edən Milli Məclisin deputatı Ceyhun Məmmədov deyib ki, bütün hallarda Tehranda baş verən hadisələrə görə həm də İran dövləti məsuliyyət daşıyır.

Azərbaycanın İrandakı səfirliyinə silahlı hücum: Mühafizənin rəhbəri öldürüldü - VİDEO
- Azərbaycan səfirliyinin təhlükəsizliyi yüksək səviyyədə təmin edilməli idi. Azərbaycanda İranın səfirliyi ən yüksək səviyyədə qorunur. İranda da bizim diplomatik orqanımız yüksək səviyyədə qorunmalı idi. Burada eyni zamanda İranın Azərbaycan əleyhinə davamlı olaraq aparılan təbliğatının da böyük rolu var. Bütün bu baş verən hadisələr fonunda İrandan Azərbaycan əleyhinə aparılan düşmənçilik təbliğatına son qoyulmalıdır, - Ceyhun Məmmədov deyib.

Deputat qeyd edib ki, "əgər kimsə düşünürsə ki, bu kimi addımlarla Azərbaycanı haqq mövqeyindən daşındıra biləcək, yanılır!".

- Səfirliyimizi peşəkarlıqla qoruyan təhlükəsizlik xidmətinin əməkdaşlarına təşəkkür edir, dünyasına dəyişənlərə rəhmət, yaralananlara şəfa diləyirəm, - Ceyhun Məmmədov baş verənlərdən təəssüfləndiyini vurğulayıb.

Tural Tağıyev
AzVision.az



Teqlər:   İran   Hücum   Səfirlik  





Xəbər lenti