Bu gün Ukraynada hərbi vəziyyət başa çatır

 Bu gün Ukraynada hərbi vəziyyət başa çatır
  26 Dekabr 2018    Oxunub:5883
Kerç boğazındakı insidentlə əlaqədar ölkənin müdafiə qabiliyyətinin gücləndirilməsi məqsədilə Ukraynanın 10 regionunda 30 gün müddətinə tətbiq edilən hərbi vəziyyət bu gün artıq başa çatır.
Azvision.az xəbər verir ki, bu barədə Ukrayna prezidenti Pyotr Poroşenko özü rəsmən bəyan edib. Bununla belə, ukraynalı ekspertlər hərbi vəziyyətin uzadıla biləcəyini istisna etmirlər.

Ukrayna Milli Təhlükəsizlik və Müdafiə Şurasının katibi Aleksandr Turçinov isə bəyan edib ki, Kiyev gəmilərin Kerç boğazından keçməsi üçün yeni keçid məntəqəsinin yaradılmasını planlaşdırır. Rusiya XİN –də Turçinovun bu bəyanatı vəziyyətin gərginləşdirilməsinə yönələn növbəti təxribat kimi qiymətləndirilib.

Qeyd edək ki, Ukrayna ilə Rusiya arasındakı münasibətlər 25 noyabrda Azov dənizi ilə Qara dənizi birləşdirən Kerç boğazında Rusiya sərhəd qüvvələri və Qara dəniz donanması tərəfindən Ukraynaya məxsus 3 artilleriya gəmisinin ələ keçirilməsi və bütövlükdə gəmilərdəki heyətin 24 üzvünü saxlamasından sonra daha da gərginləşib. Ukrayna prezident Petro Poroşenko Kerç boğazındakı insidentlə əlaqədar ölkədə 60 günlük hərbi vəziyyətin tətbiq edilməsi ilə bağlı məsələni Ali Radaya göndərmişdi. Lakin bu, deputatların çoxunda narazılıqla qarşılandı və Poroşenkonun seçiqabağı rıçağı kimi qiymətləndirildi. Nəticədə Ali Rada hərbi vəziyyətin müddətini 30 günə endirərək noyabrın 26-da Poroşenkonun hərbi vəziyyətlə bağlı fərmanını təsdiqləyib.

Hərbi vəziyyət seçkilərdə iştirak hüququ, fikir və söz azadlığı daxil olmaqla vətəndaşların konstitusion hüquq və azadlıqlarının müvəqqəti məhdudlaşdırılmasının mümkünlüyünü nəzərdə tutur.

Leyla Elbrusqızı
Azvision.az




Teqlər: Ukrayna   Kerç   Rusiya  





Xəbər lenti