“QDİƏT siyasi döyüş meydanı olmamalıdır” - Lavrovun Bakıdakı çıxışı
Azvision.az xəbər verir ki, bu sözləri Bakıda keçirilən QDİƏT Xarici İşlər Nazirləri Şurasının 39-cu iclasında çıxış edən Rusiyanın xarici işlər naziri Sergey Lavrov deyib.
Rusiyalı nazir Qara dəniz regionunda iqtisadi əməkdaşlıq potensialının böyük olduğunu, lakin onun hələ tam həcmdə həyata keçirilmədiyini də deyib. Bu mənada Lavrov vurğulayıb ki, həmin potensialın effektiv realizəsində QDİƏT faydalı töhfə verə bilər.
O həmçinin, QDİƏT ilə Avrasiya İqtisadi İttifaqı arasında qarşılıqlı anlaşma memorandumu imzalanmasının hər iki təşkilat üçün faydalı ola biləcəyini deyib.
Qeyd edək ki, QDİƏT 1999-cu ildə yaradılıb və tərkibinə 12 dövlət daxildir. Bunlar Azərbaycan, Albaniya, Ermənistan, Bolqarıstan, Yunanıstan, Gürcüstan, Moldova, Rusiya, Rumıniya, Serbiya, Türkiyə və Ukraynadır.
Xatırladaq ki, Azərbaycan QDİƏT-ə sədrliyi bu ilin iyun ayında qəbul edib. Nazir Elmar Məmmədyarov bildirib ki, təşkilata sədrlik dövründə prioritet regionda nəqliyyat qovşağının inkişafı olacaq. Onun sözlərinə görə, Azərbaycan bu müddətdə turizm, kənd təsərrüfatı, rabitə kimi sahələrin inkişafına da xüsusi diqqət yetirəcək.
Leyla Elbrusqızı
Azvision.az
Teqlər: Rusiya QDİƏT Azərbaycan