İnformasiya-analitik sistemi yaradılır
İnstitutdan AzVision.az-a bildiriblər ki, iclasda şöbə müdiri Gülnarə Nəbibəyova cari ildə görüləcək işlər barədə məlumat verib. Bildirilib ki, xarici siyasət sahəsində “OLAP” texnologiyaları əsasında qərarların qəbul edilməsini dəstəkləyən informasiya-analitik sistemin işlənilməsi istiqamətində araşdırmalar davam etdirilir. Bundan əlavə, qərarların qəbulunu dəstəkləyən sistemlərdə verilənlər anbarı atributlarının fazzifikasiyası metodları və qeyri-səlis “OLAP” modeli işlənilir.
Şöbə müdiri Azərbaycanda terminoloji informasiya sisteminin yaradılması üzrə tədqiqatların aparıldığını, bu istiqamətdə araşdırmaların cari ildə də davam etdiriləcəyini deyib. Qeyd olunub ki, şöbədə veb-resursların optimallaşdırılmasının elmi-nəzəri problemlərinin təhlili və tədqiqi, media-analitikanın mövcud vəziyyəti, sosial media problemləri istiqamətlərində də elmi araşdırmalar aparılacaqdır.
Sonra AMEA-nın www.science.gov.az rəsmi portalı və institutun www.ict.az saytının 2014-cü il üçün fəaliyyət planı təqdim edilib. AMEA-da aparılan struktur dəyişiklikləri və islahatlarla əlaqədar portalın və saytın yeni versiyalarının hazırlandığını diqqətə çatdıran məruzəçi bildirilib ki, bu versiyalarda innovativ texnologiyaların tətbiqi ilə yanaşı, AMEA-nın qurumları və əməkdaşları haqqında informasiya təminatı da yenilənəcəkdir. Həmçinin AMEA-nın qurumları tərəfindən keçirilən mühüm elmi tədbirlərin onlayn yayımı təşkil olunacaq.
Daha sonra fəaliyyət planı ətrafında müzakirələr aparılıb, rəy və tövsiyələr səsləndirilib.
Teqlər: