“Xalqımız üçün yorulmadan gördüyünüz işləri alqışlayırıq” - Prezidentə yazırlar

  “Xalqımız üçün yorulmadan gördüyünüz işləri alqışlayırıq” -    Prezidentə yazırlar
  06 İyun 2020    Oxunub:4425
Prezident İlham Əliyevə minnətdarlıq məktubları ünvanlanmaqda davam edir. Ölkəmizin bütün bölgələrindən, eləcə də xaricdən həmvətənlərimiz dövlətimizin başçısının diqqət və qayğısını yüksək qiymətləndirdiklərini yazırlar.
Azvision.az Prezidentin saytına istinadla minnətdarlıq məktublarının bir neçəsini təqdim edir.

Qusar rayonunun Yasaboba kəndindən şagird Yaşar Şahbazov yazır: “Əziz Prezidentim, əvvəla Sizə ailənizlə birgə cansağlığı arzulayıram. Koronavirusla mübarizənin birinci mərhələsində qalib gəldiyimizə görə Sizə sonsuz təşəkkürümü bildirirəm. Sizin qabaqlayıcı tədbirləriniz sayəsində itkilərimiz digər ölkələrlə müqayisədə çox-çox aşağıdır. Biz hər zaman Sizin tapşırıqlarınıza və tövsiyələrinizə diqqətlə qulaq asır, onlara riayət edirik. Karantin dövründə anamla çox vaxt keçirdim, maraqlı "Evdə qal!" videolarını hazırladıq. Cənab Prezident, televizorda çıxışlarınızı daim izləyir, Sizi gördüyümə çox sevinir, Sizə diqqətlə qulaq asıram. Mənim ən böyük arzum maksimum balla ali məktəbə qəbul olmaqdır. Bunun üçün səylə çalışıram, əlaçıyam, kitabxananın fəal oxucusuyam. Gələcəkdə yol polisi olmaq istəyirəm. Anam deyir ki, hansı peşənin sahibi olsam da, Sizin qayğınızı hiss edəcəyəm. Məncə, o, haqlıdır. Çünki Siz hər bir azərbaycanlının Prezidentisiniz”.

Böyük Britaniyanın Birminhem şəhərindən Nərmin İsmayılova: “Hörmətli cənab Prezident, mən, İsmayılova Nərmin İngiltərənin Birminhem Universitetində doktorantura təhsili alıram. Bütün dünyanı bürüyən COVID-19 pandemiyası ilə əlaqədar İngiltərədə də karantin rejimi elan edildi və bu rejim hələ də davam edir. Karantin rejiminə görə iş yerlərinin bağlanması xaricdə oxuyan və eyni zamanda işləyən tələbələrin həyatında maddi cəhətdən çətinlik yaratdı. Eyni problemi tələbə olaraq mən də yaşadım. Maddi vəziyyətimə görə ölkəmizin İngiltərədəki səfirliyinə müraciət etdim. Səfirliyin əməkdaşları vəziyyətimdən xəbər tutan gündən mənimlə mütəmadi əlaqə saxlayır, maarifləndirici tövsiyələr verərək mənə maddi və mənəvi dəstək olurlar. Hər zaman dövlətimizin köməyini hiss etmişəm və buna görə də hörmətli Prezident, dəstəyinizə görə Sizə təşəkkürümü bildirirəm”.

Bakı şəhərinin Binəqədi rayonundan Xuraman Tağıyeva: “Möhtərəm cənab Prezident. Sizin həyata keçirdiyiniz uğurlu daxili və xarici siyasət sayəsində ölkəmiz təkcə regionda deyil, dünya miqyasında lider dövlətlərdən birinə çevrilib. Sizin xalqımızın həyat səviyyəsinin yüksəldilməsi və maddi rifah halının yaxşılaşdırılması istiqamətində həyata keçirdiyiniz işlər, verdiyiniz qərarlar, pandemiya dövründə işsiz şəxslərə ayırdığınız 190 manat birdəfəlik müavinət, maddi yardımlar, sosial sahədə dövlət tərəfindən göstərilən dəstək tədbirləri hər bir vətəndaş kimi, məni də çox sevindirir. Bu işlərin hamısı Sizin və Mehriban xanımın sayəsində baş verir. İşləməyən şəxslərə birdəfəlik 190 manat verilməsi bütün xalqın sevincinə səbəb oldu. Mən də aprel və may aylarında bu yardımdan yararlandım. Bir ana kimi Sizə minnətdarlığımı bildirirəm. Sizinlə fəxr edirik, cənab Prezident”.

Tovuz rayonunun Əsrik Cırdaxan kəndindən Məmmədqasım Bayramovun məktubunda deyilir: “Əziz Prezidentimiz, Sizin uzaqgörənliyiniz sayəsində koronavirus pandemiyasının birinci mərhələsindən az itki və az yoluxma ilə qurtulduq. Bu çətin vəziyyətdə tibb işçilərimiz Sizin də dəstəyinizlə və qayğınızla öz işlərini canla-başla yerinə yetirdilər. Siz bu pandemiya dövründə hər bir azərbaycanlının yanında oldunuz. İmkanı olmayan ailələr, işə gedə bilməyən vətəndaşlar 190 manat ödəmə və ərzaq ilə təmin edildilər. Siz həmişə biz pensiyaçıların da qeydinə qalırsınız. Mən şəxsəm öz adımdan və yaşadığım kəndin sakinləri adından Sizə ürəkdən təşəkkürümü bildirirəm. Çox sağ olun ki, hər zaman xalqımızla birlikdəsiniz”.

Bakının Nərimanov rayonundan Bəylər Əzimov: “Möhtərəm cənab Prezident, bu gün müstəqil respublikamızın əldə etdiyi nailiyyətlər, beynəlxalq aləmdə nüfuzunun artması məhz Sizin sayənizdə mümkün olub. Gənclərimizin sosiallaşması və cəmiyyətə düzgün inteqrasiyası üçün Sizin dəstəyinizlə davamlı olaraq xüsusi addımlar atılır. İmzaladığınız sərəncamlar insanlarımızın sosial rifahının yaxşılaşdırılmasına xidmət edir. Son aylarda dövlət strukturlarının modernləşdirilməsinə və yeni islahatlara xüsusi diqqət ayırırsınız. Rəhbər vəzifələrə gənc və bacarıqlı mütəxəssislərin, eləcə də müasir dünyagörüşünə malik kadrların təyin olunması bizi ruhlandırır. İnanırıq ki, seçib qiymətləndirdiyiniz, irəli çəkib vəzifələrə təyin etdiyiniz gənclər Sizin etimadını doğruldacaq və öz vəzifələrini layiqincə yerinə yetirəcəklər. Gənclərimizin Yeni Azərbaycan Partiyasına inamı ulu öndərimiz Heydər Əliyevin apardığı siyasətdən və Sizin bu siyasəti uğurla davam etdirməyinizdən qaynaqlanır. Azərbaycanda yeni demokratik eranın başlanğıcı vətəndaşlarımızda Sizə və dövlətimizə olan inam və etibar hissini daha da möhkəmləndirir. Cənab Prezident, ölkə gəncləri adından Sizə bir daha dərin təşəkkürümüzü bildirir, çoxşaxəli fəaliyyətinizdə uğurlar arzulayırıq”.

Şəmkir rayonunun Əliyaqublu kəndindən II qrup Çernobıl əlili Mahir Kazımov: “Çox hörmətli Prezidentimiz, Siz ümummilli liderimiz Heydər Əliyevin siyasi məktəbinin layiqli yetirməsi, onun zəngin dövlətçilik təcrübəsindən yararlanan dövlət başçısınız. Sizin sayənizdə Azərbaycan dünyanın ən nüfuzlu, qüdrətli dövlətləri sırasına yüksəlib, beynəlxalq aləmdə böyük nüfuz qazanıb, vətəndaşların sosial rifahı yaxşılaşıb. Siz xalqımızı koronavirusdan qoruyursunuz, çalışırsınız ki, Azərbaycan xalqı sağlam və xoşbəxt yaşasın. Bütün bunlara görə də Azərbaycan xalqı daim Sizinlədir. Cənab Prezident, mən və ailə üzvlərim Sizə cansağlığı, uzun ömür, nailiyyətlər arzulayırıq. Allah Sizi və ailənizi qorusun!”.

Bakının Yasamal rayonundan Qəhrəman Ələkbərov: “Əziz və hörmətli Prezidentimiz, Azərbaycan Respublikasının varlığı ulu öndər Heydər Əliyevin, müasir inkişaf səviyyəsi isə Sizin adınızla bağlıdır. Sizin sayənizdə şəhərlərimizdə, rayonlarımızda və bütün bölgələrimizdə aparılan abadlıq-quruculuq işləri danılmazdır. Bu gün elə bir dövrə təsadüf edir ki, bir tərəfdən, bədnam Ermənistanla, digər tərəfdən, qaçıb xarici ölkələrdə gizlənərək ölkəmizə qarşı təxribat kampaniyaları aparanlarla, həmçinin gözəgörünməz düşmən olan koronavirusla mübarizə aparırıq. Sizin "Biz birlikdə güclüyük!" çağırışınız, Mehriban xanımım bir övlad, bir ana və nənə kimi müraciəti bütün xalqı mübarizəyə səfərbər etdi. İnanırıq ki, biz bütün bu mübarizələrdə qalib gələcəyik. Siz Azərbaycan xalqına hər zaman dayaq olmusunuz. Təbii fəlakətlər baş verəndə də sakinlərin yanında olub onlara kömək göstəmisiniz. Mehriban xanım neçə-neçə xəstəni həm öz ölkəmizdə, həm də xaricdə müalicə etdirib ailələrinə qovuşdurub. Görülmüş işləri sadalamaqla qurtarmır. Uca Tanrı Sizi və Mehriban xanımı bu xalqa çox görməsin, ailənizi və əzizlərinizi qorusun!”.

Ağcabədi rayonundan Məlahət Tağıyeva: “Möhtərəm cənab Prezident, dünyanı cənginə alan COVID-19 pandemiyası təəssüf ki, Azərbaycandan da yan keçmədi. Amma Sizin rəhbərliyinizlə dövlət və hökumət orqanları tərəfindən görülən ardıcıl və səmərəli tədbirlər nəticəsində ölkə vətəndaşlarının bu təhlükəli virusa yoluxma riskini minimuma endirmək mümkün oldu. Koronavirus epidemiyası bütün dünya dövlətlərində olduğu kimi, ölkəmizin də iqtisadiyyatına, maliyyə sisteminə öz təsirini göstərdi. Ölkəmizdə həyata keçirilən qabaqlayıcı tədbirlər həm iqtisadiyyatın, həm də maliyyə sisteminin bu vəziyyəti böhransız adlamasına şərait yaratdı. Dünyanın nəhəng dövlətlərinin pandemiya qarşısında aciz qaldığı bir zamanda məhz Sizin rəhbərliyinizlə atılan qətiyyətli addımlar sayəsində biz bu gün öz həyatımızı arxayınlıq və rahatlıq içərisində yaşayırıq. Hörmətli cənab Prezident, Sizin "Biz birlikdə güclüyük!" çağırışınız bu gün xalqımızın həmrəylik şüarına çevrilib. Hər bir vətəndaşımız Sizin nəcib və nümunəvi addımınıza həmrəylik göstərərək, xalq-iqtidar birliyini nümayiş etdirib ölkəmizin bu böyük bəladan qurtulması, eləcə də vətəndaşlarımızın sosial rifahının yaxşılaşdırılması naminə əlindən gələni əsirgəmir. Ölkə əhalisinin rahatlığı və sağlamlığı naminə yürütdüyünüz siyasətə, verdiyiniz hər bir qərarda, ilk növbədə, xalqın rifahını düşündüyünüzə görə Sizə dərin minnətdarlığımı bildirirəm”.

Goranboy rayonunun Eyvazlılar kəndindən Göyüş Nağıyev: “Hörmətli cənab Prezident, biz fəxr edirik ki, Sizin kimi dövlət başçımız var. Ulu öndər Heydər Əliyevin layiqli davamçısı olaraq Siz xalqımızın üzləşdiyi çətin günlərdə həmişə çıxış yolu tapıb onu öz arxanızca aparmısınız. Mən bir müharibə veteranı, iki tələbə valideyni kimi Sizin ölkəmizdə koronavirus pandemiyasına qarşı gördüyünüz tədbirləri dəstəkləyirəm. Sizin bu ilin mart ayında Goranboy Şəhər Mərkəzi Xəstəxanasının açılışını etməyiniz koronavirus dövründə atılmış böyük addımdır. Pandemiya dövründə ölkəmizdə aparılan dezinfeksiya işlərinə, aztəminatlı şəxslərə birdəfəlik yardımın edilməsinə, sosial baxımdan həssas ailə qrupuna daxil olan tələbələrə göstərdiyiniz yardıma görə Sizə minnətdarlıq etməyi özümə borc bilirəm. Şagirdlərin təhsildən kənar qalmamaları üçün onlarla onlayn dərslərin keçirilməsi, pandemiya dövründə müəllimlərin əməkhaqqının tam ödənilməsi Sizin qabaqcıl siyasətinizin bariz nümunələridir. Bütün bunlara görə xalq Sizə minnətdardır”.

Gədəbəy rayonunun Arıqıran kəndindən Qaratel Qarayeva: “Əziz Prezidentimiz İlham Əliyev, bütün dünyanı böhran bürüdüyü bir vaxtda Azərbaycanımızın hər bölgəsində, o cümlədən Gədəbəyimizdə və Arıqıran kəndində aparılan quruculuq-abadlıq işlərinə görə çox sağ olun. Elektrik xətlərimiz 1965-ci ildə çəkilmişdi. Elektrik enerjisi sarıdan çox əziyyət çəkirdik. Külək əsən kimi işıqlarımız sönürdü. O cümlədən kəndimizdə yanacaqla bağlı da problem var idi. Cənab Prezident, indi Arıqıran və Əyrivəng kəndlərində işıq sistemi yenidən qurulur. Kəndimizə xəyalımıza belə gətirmədiyimiz təbii qaz xətti çəkilir. Bu, bizi çox sevindirir. Biz sakinlərə göstərdiyiniz diqqət və qayğıya görə Sizə və Mehriban xanıma minnətdarıq. Allah Sizi, ailənizi və Azərbaycanımızı qorusun!”.

Lənkəran şəhərindən Əskər Qafarov: “Çox hörmətli Prezident, Sizin xalqımız, dövlətimiz üçün yorulmadan gördüyünüz işləri alqışlayırıq. Siz həqiqətən, xalq üçün çalışırsınız. Biz bu yolda Sizin bütün səylərinizi ürəkdən dəstəkləyirik. Siz də, Mehriban xanım da xalqımızın xoş, firavan yaşamağını istəyirsiniz, hər tərəfdə işıq var, qaz var. Su xətləri çəkilir, yollar salınır, vətəndaşların müraciətləri dinlənilib həll olunur, iş yerləri açılır, maaşlar, müavinətlər vaxtında ödənilir, ehtiyacı olanlara yardımlar edilir. Cənab Prezident, yaşadığımız küçə bu günlərdə yüksək səviyyədə abadlaşdırılaraq asfaltlandı. İndi küçəmiz çox səliqəli, təmizdir. Bütün bunlar Sizin və Mehriban xanımın insanpərvərliyinizin göstəricisidir. Biz Sizinlə fəxr edirik. Nə yaxşı ki, Siz varsınız. Sizə güvənirik, Allah Sizi qorusun! Çox sağ olun!”.

Azvision.az


Teqlər: İlham-Əliyev   Prezident  





Xəbər lenti