“Fonda 100 milyon manatdan çox vəsait toplanıb” - Mikayıl Cabbarov

  31 Mart 2020    Oxunub : 2532
“Fonda 100 milyon manatdan çox vəsait toplanıb” - Mikayıl Cabbarov
İqtisadiyyat naziri Mikayıl Cabbarov Koronavirusla Mübarizəyə Dəstək Fonduna vəsait köçürən şəxslərə təşəkkür edib.
Azvision.az xəbər verir ki, nazir bu barədə "Facebook" səhifəsində məlumat yayıb.

"Məlum olduğu kimi, Azərbaycan Respublikası Prezidentinin Fərmanı ilə ölkəmizdə Koronavirus (COVİD-19) pandemiyasına qarşı preventiv addımların atılması və mübarizə tədbirlərinin gücləndirilməsi məqsədilə Koronavirusla Mübarizəyə Dəstək Fondu yaradılıb. İlk olaraq dövlət başçısı cənab İlham Əliyev və birinci vitse-prezident Mehriban xanım Əliyeva bir illik əmək haqlarını bu fonda köçürüblər.

Hər bir Azərbaycan vətəndaşının, o cümlədən dövlət məmurlarının, iş adamlarının, sadə insanların səyləri ilə fondda artıq 100 milyon manatdan çox vəsait toplanıb.

İqtisadiyyat Nazirliyi, onun strukturuna daxil olan və tabeliyində olan qurumların rəhbər vəzifəli şəxsləri və sıravi əməkdaşları olaraq siz də həmrəylik, birlik və vətəndaşlıq məsuliyyəti nümayiş etdirərək bu nəcib addımdan kənarda qalmamısınız, adıçəkilən sosial təşəbbüsü könüllü olaraq əmək haqları və ianələr ilə dəstəkləmisiniz.

Hər birinizə dərin minnətdarlığımı bildirir, sizinlə birlikdə çalışmaqdan qürur hissi keçirdiyimi ifadə etmək istəyirəm. Belə bir məsuliyyətli zamanda bütün çətinlikləri birlikdə dəf edəcəyimizə, bu sınaqdan da üzüağ çıxacağımıza əminəm!", - deyə nazir paylaşımında qeyd edib.

Azvision.az

Teqlər: İqtisadiyyat-Nazirliyi   Koronavirus   Fond