Ölkədə ekoloji siyasətin əsas prioritetləri

  30 Oktyabr 2019    Oxunub : 680
Ölkədə ekoloji siyasətin əsas prioritetləri
Alman-Azərbaycan Xarici Ticarət Palatası (AHK Azərbaycan) Hyatt Konfrans Mərkəzində üzv şirkətlər üçün Uniper Global Commodities SE şirkətinin sponsorluğu ilə növbəti AHK İmpuls tədbirini təşkil edib.
Palatadan Azvision.az -a verilən məlumata görə, tədbirin fəxri qonağı Ekologiya və Təbii Sərvətlər naziri Muxtar Babayev “Azərbaycanda Ekoloji Siyasətin Əsas Prioritetləri” adlı təqdimat ilə çıxış edib.

Görüşdə M.Babayev tədbir iştirakçılarını ətraf mühitin mühafizəsi, ekoloji tarazlığın qorunması, mövcud ekoloji problemlərin həlli istiqamətində dövlət tərəfindən həyata keçirilən tədbirlər, eyni zamanda Nazirliyin qarşısında duran vəzifələr və mövcud ekoloji problemlərin həlli yolları barədə məlumatlandırıb. Azərbaycanda atmosfer çirklənməsi ilə bağlı mövcud statistika barədə məlumat verən cənab Babayev ekoloji təmiz yanacaqdan istifadənin təşviqinin və ölkədə hava keyfiyyətinin monitorinq sisteminin modernləşdirilməsinin vacibliyini vurğulayıb.

Bununla yanaşı, nazir qeyd edib ki, bərpa olunan enerji mənbələrindən və enerji qənaətli texnologiyalardan istifadənin artırılması, istilik elektrik stansiyalarında qara yağdan istifadənin dayandırılması, meşə sahələrinin genişləndirilməsi, səmt qazlarının həcminin ilbəil azaldılması, Azərbaycanda iqlim dəyişikliyinin təsirlərinin aradan qaldırılması istiqamətində görülən tədbirlərdən bir neçəsidir. M.Babayev bildirib ki, hal hazırda QobustanSamux rayonlarında, eləcə də Bakının Pirallahı, Suraxanı və Sahil qəsəbələrində günəş elektrik stansiyaları fəaliyyət göstərir.

O cümlədən, qeyd olunub ki, Azərbaycan özünün nəzərdə tutulan müəyyən edilmiş Milli Töhfələri sənədində ölkənin milli şəraitini, gələcək inkişaf perspektivlərini və milli maraqlarını nəzərə alaraq, qlobal iqlim dəyişmələrinə təsirlərin yumşaldılması təşəbbüslərinə özünün töhfəsi olaraq baza ili olan 1990-cı il ilə müqayisədə 2030-cu ilə istilik effekti yaradan qaz emissiyalarının 35% azalma səviyyəsində saxlanılmasını hədəf kimi götürüb.

Azvision.az

Teqlər: ETSN   Muxtar-Babayev