Oqtay Əsədov AŞPA sədrilə görüşüb

  25 Oktyabr 2019    Oxunub : 946
Oqtay Əsədov AŞPA sədrilə görüşüb
Strasburqda Avropa Şurasına üzv dövlətlərin, eləcə də tərəfdaş, müşahidəçi qismində iştirak edən ölkələrin parlament sədrlərinin konfransında iştirak edən Milli Məclisin Sədri Oqtay Əsədovun AŞPA-nın sədri Lilian Mori Paskye ilə görüşü olub.
Azvision.az xəbər verir ki, görüşdə Azərbaycanla Avropa Şurası arasında münasibətlər geniş müzakirə edilib və perspektivlərə dair fikir mübadiləsi aparılıb.

Lilian Mori Paskye bir neçə gün əvvəl “Lanzarot konvensiyası” kimi tanınan “Uşaqların cinsi istismardan və cinsi zorakılıqdan müdafiəsi haqqında” Avropa Şurası Konvensiyasının Milli Məclisdə ratifikasiya edilməsini alqışlayaraq, Oqtay Əsədova təşəkkürünü bildirib. Bu konvensiyanın ölkəmiz və Avropa Şurası arasında əlaqələrin daha da inkişaf etdirilməsində önəmli rol oynayacağını vurğulayıb.

Milli Məclisin Sədri ölkəmizdə aparılan islahatlar haqqında Lilian Mori Paskyeni ətraflı məlumatlandırıb. Bildirib ki, bu islahatlar Avropa və beynəlxalq standartlara uyğundur. Azərbaycandakı ictimai-siyasi vəziyyətə toxunan Oqtay Əsədov qeyd edib ki, ölkəmizdə Avropada da bölüşülən hüquqlar, azadlıqlar təmin edilir. Müxtəlif destruktif qüvvələr təxribatlar vasitəsi ilə münasibətlərimizə xələl gətirmək istəsələr də, buna nail olmayacaqlar və əməkdaşlığımız daha da möhkəmlənəcək.

Görüşdə AŞPA-nın sədri Lilian Mori Paskye dialoqun, əlaqələrin genişləndirilməsinə töhfə verməyə və yardım etməyə həmişə hazır olduğunu bildirib.

Azvision.az

Teqlər: AŞPA   Spiker