Nazirlikdə Barama İstehsalçıları Şurası yaradılıb

Nazirlikdə Barama İstehsalçıları Şurası yaradılıb
  17 Oktyabr 2019    Oxunub:1192
Kənd Təsərrüfatı Nazirliyində Barama İstehsalçıları Şurasının yaradılmasına həsr olunmuş toplantı keçirilib. Tədbirdə Kənd Təsərrüfatı Nazirliyinin nümayəndələri, ölkənin qabaqcıl kümçüləri və barama qurdunun bəslənməsi üzrə məsləhətçilər iştirak edib.
Nazirliyin İctimaiyyətlə əlaqələr və informasiya təminatı şöbəsindən Azvision.az -a verilən məlumata görə, iclasda Azərbaycan Respublikasının Prezidenti İlham Əliyevin rəhbərliyi ilə ölkə iqtisadiyyatının bütün sahələrində böyük nailiyyətlərin əldə olunduğu diqqətə çatdırılıb. Qeyd olunub ki, 2016-cı ildən başlayaraq respublikamızda ipəkçiliyin müasir infrastrukturunun yaradılması istiqamətində müvafiq tədbirlərin həyata keçirilməsinə başlanılıb, baramaçılığın yem bazasının bərpa olunması üçün Çin Xalq Respublikasından ölkəmizə 3,5 milyon ədəd tut tingi gətirilib, əvəzi ödənilmədən 38 rayonunda barama istehsalı ilə məşğul olan kümçülərə paylanılıb. Mütəxəssislərin nəzarəti altında 350 hektara yaxın sahədə yeni tut bağları salınıb, tinglərin əkilməsi və budanması qaydaları barədə fermerlərə müvafiq məsləhətlər verilib. Həyata keçirilən tədbirlər nəticəsində respublikada 2007-ci ildən bəri ilk dəfə olaraq 2016-cı ildə 70,7 ton, 2017-ci ildə 245 ton, 2018-ci ildə 514 ton, 2019-cu ildə 641 ton yaş barama məhsulu istehsal edilib.

İclasda qeyd olunub ki, Barama İstehsalçıları Şurasının yaradılmasında əsas məqsəd baramaçılıq və ipəkçiliyin inkişafı sahəsində nəzərdə tutulan tədbirləri əlaqələndirməkdir.

Tədbirdə çıxış edən kümçülər Barama İstehsalçıları Şurasının işində fəal iştirak edəcəklərini bildirib, təkliflərini səsləndiriblər.

İclasda 11 nəfərdən ibarət olmaqla, Barama İstehsalçıları Şurasının üzvləri formalaşdırılıb. Aqrar Elm və İnnovasiyalar Mərkəzinin direktoru İmran Cümşüdov Barama İstehsalçıları Şurasının sədri seçilib.

Tədbirin sonunda Barama İstehsalçıları Şurasının gələcək fəaliyyəti, baramaçılıq və ipəkçiliyin inkişafı ilə bağlı müzakirələr aparılıb.

Azvision.az


Teqlər: KTN   Şura  





Xəbər lenti