Çaylarda sululuq artıb, daşqın olub

  20 May 2019    Oxunub : 808
Çaylarda sululuq artıb, daşqın olub
Respublika çaylarında mövcud vəziyyət açıqlanıb.
Ekologiya və Təbii Sərvətlər Nazirliyinin Milli Hidrometeorologiya Departamentindən Azvision.az -a verilən məlumata görə, ötən günlər ərzində yağan yağışın bəzi yerlərdə leysan xarakterli olması nəticəsində Böyük Qafqazın bəzi çaylarında sululuq artıb, Kişçay çayında isə qısamüddətli daşqın müşahidə olunub.

Hazırda Böyük Qafqazın Quba-Xaçmaz bölgəsindən axan Vəlvələçay çayında sululuq ongünlük normadan çox olmaqla normanın 130, Kiçik Qafqazın ərazisindən axan Kürəkçay və Zəyəmçay çaylarında sululuq ongünlük normadan az olmaqla 40-70, Lənkəran-Astara bölgəsindən axan Lənkərançay, Vəşərüçay və Viləşçayda isə sululuq ongünlük normadan az və norma daxilində olmaqla 50-100 faizini təşkil edir.

Tranzit çaylarda faktiki vəziyyət

Mayın 20-də Kür çayının Qıraqkəsəmən məntəqəsində suyun səviyyəsində 6 sm artım müşahidə olunub. Hazırda məntəqədə su sərfi 490 m3/s qeydə alınır ki, bu da ongünlük normadan az olmaqla normanın 66 faizini təşkil edir. Mövcud vəziyyət 2018-ci ilin müvafiq dövrü ilə müqayisədə 400 m3/s olmaqla, ongünlük normadan az olub.

Mayın 20-də Qanıx çayının Əyriçay məntəqəsində suyun səviyyəsində 21 sm azalma müşahidə olunub. Hazırda məntəqədə su sərfi 177 m3/s qeydə alınır ki, bu da ongünlük normaya yaxın olmaqla normanın 87 faizini təşkil edir. Bu rəqəm 2018-ci ildə 140 m3/s təşkil etməklə ongünlük normadan az olub.

Araz çayının Qıvraq məntəqəsində suyun səviyyəsində 3 sm artım müşahidə olunub. Hazırda məntəqədə su sərfi 339 m3/s qeydə alınır ki, bu da ongünlük normaya yaxın olmaqla normanın 88 faizini təşkil edir. Bu rəqəm 2018-ci ildə 166 m3/s təşkil etməklə ongünlük normadan az olub.

Kür çayının aşağı axınında hazırki vəziyyət

Mayın 20-də Kür çayının aşağı axınında suyun səviyyəsində əsasən artım müşahidə olunub. Belə ki, Kür çayının Surra məntəqəsində suyun səviyyəsi 5 sm artaraq 440 sm təşkil edib. Bu rəqəm 2018-ci il mayın 20-də isə 314 sm olub. Şirvan məntəqəsində suyun səviyyəsi 2 sm artaraq 235 sm qeydə alınıb. 2018-ci il mayın 20-də isə bu rəqəm 159 sm təşkil edib. Salyanda suyun səviyyəsi 2 sm azalıb və 263 sm olub. Məntəqədə suyun səviyyəsi 2018-ci ilin müvafiq dövründə 69 sm qeydə alınıb. Bankə məntəqəsində suyun səviyyəsi 4 sm artaraq 227 sm olub və bu göstərici 2018-ci il mayın 20-də 167 sm qeydə alınıb. Araz çayının Novruzlu məntəqəsində isə suyun səviyyəsi 2 sm artaraq 182 sm müşahidə olunub. Bu rəqəm 2018-ci il mayın 20-də isə 42 sm təşkil edib.

Azvision.az

Teqlər: ETSN   Çay