Ə.Əhmədov qeyd edib ki, Azərbaycanın inkişafını gözü götürməyən qüvvələr var: "Onlar bizim inkişafımızdan məyus olurlar. Müxtəlif formada inkişafın qarşısını almaq üçün tədbirlər görməyə çalışırlar. Bəlkə də bunu normal qəbul etmək olar. Çünki inkişaf edən dövlətə ayrı-ayrı dövlətlərin və yaxud ayrı-ayrı beynəlxalq təşkilatların qıcıqlanması bir qədər başa düşüləndir. Başa düşülməyən isə ölkə daxilində olan və müxalifət adı altında Azərbaycana böhtan atan, reallıqları təhrif edən, vətəndaşları çaşdırmağa çalışanlardır".

YAP-ın icra katibi radikal müxalifətə səslənərək deyib: "Mən cəmiyyətin kiçik bir hissəsini təşkil edən radikal müxalifətə demək istəyirəm ki, Azərbaycanda söz azadlığı təmin edilir və bu azadlıqdan istifadə etmək istəyənlər özlərinə xas şəkildə edirlər. Ancaq bu hüquqlardan sui-istifadə edərək Azərbaycanda qarşıdurma yaratmağa çalışan, ölkədəki sabitliyi pozmaq niyətinə düşən qüvvələr də var. Müxalifətin bir hissəsi olan radikal müxalifət mitinqdən qarşıdurma yaratmaq üçün istifadə edir. Onlar söz və fikir azadlığından Azərbaycan vətəndaşlarını, Azərbaycan xalqını təhqir etmək üçün istifadə edirlər. Öz siyasi fəaliyyətlərində Azərbaycan üçün mümkün ola biləcək ən pis ssenariləri əsas götürürlər. Bu mənada Yeni Azərbaycan Partiyasının sıralarında olan gənclər bu həqiqətləri öz həmyaşıdlarına, dostlarına izah etməyə borcludurlar".

Elvin Abdulqədirov
Azvision.az