BMT-nin Əhali Fondu media üçün seminar keçirəcək
"BMT-nin Əhali Fondu artıq bir neçə ildir ki, doğulanlar arasında cins nisbətinin pozulması, selektiv abortların qarşısının alınması və qız uşaqlarının dəyərinin artırılması mövzusunda həyata keçirdiyi ölkəmiqyaslı layihələr çərçivəsində media ilə iş komponentinə böyük üstünlük verir. Bu strategiyamızın nəticəsi olaraq biz sözügedən problemlərin daha geniş müzakirəsinə və daha böyük auditoriyaya çatıdılmasına nail ola bilmişik. Məlum olduğu kimi, sözügedən məsələnin işıqlandırılmasında və bu sahədə ictimai məlumatlılığın artırılmasında medianın rolu danılmazdır. Biz, istər ənənəvi, istərsə də yeni media vasitələrini oğlan uşaqlarına üstünlük verilməsi problemi və doğulanlar arasında gender əsaslı cins seçiminin aradan qaldırılması istiqamətindəki milli təşviqat işində bu dəfə də fəal iştirak etməyə çağırırıq”, deyə BMT-nin Əhali Fondunun Azərbaycan Nümayəndəliyin baş müşaviri Fərid Babayev bildirib.
24-25 may tarixlərində Bakıda keçiriləcək praktik seminar vasitəsilə insan haqları, gender ayrı-seçkiliyi, gender əsaslı zorakılıq və s. bu kimi mövzuları işıqlandıran media nüməyəndələrinin doğulan uşaqların cins nisbətinin pozulmasının səbəb və nəticələri haqqında məlumatlılığının artırılması nəzərdə tutulub. Bununla yanaşı, iştirakçılara ənənəvi və yeni media vasitələrinin, sosial media alətlərinin bu mövzudakı təşviqat işində istifadə olunması üçün praktik biliklər veriləcək.
Təlim bitdikdən sonra iştirakçılar arasında müsabiqə təşkil olunacaq və ən yaxşı yazı, foto və ya video materialın qalibi müəyyən ediləcək. Qalib Türkiyədəki böyük media holdinqlərdən birinə qısamüddətli təcrübə keçmək imkanı qazanacaq.
Təlimdə iştirak etmək istəyən jurnalistlər, vloqqer və bloqqerləri may ayının 2-i, saat 18.00-a kimi özləri haqda məlumatı, eyni zamanda gender problemləri sahəsində bundan əvvəl hazırladıqları yazı və video/foto materialı [email protected] ünvanına göndərə bilərlər. Yazıları Azərbaycan və us dilində təqdim etmək olar. Praktiki seminar iştirakçıların seçimi may ayının 10-dək başa çatacaq və yalnız iştirak hüququ qazanmış şəxslərlə əlaqə saxlanılacaq.
AzVision.az