Məzahir Pənahov AŞPA-nın nümayəndə heyəti ilə görüşüb
Mərkəzi Seçki Komissiyası Katibliyinin media və ictimai əlaqələr şöbəsindən AzVision.az-a verilən məlumata görə, MSK-nın sədri AŞPA müşahidəçilərinin qarşıdan gələn parlament seçkilərində müşahidəçilik missiyasını həyata keçirəcəklərindən məmnun olduğunu qeyd edib.
Missiyanın rəhbəri seçkilərdə müşahidəçilik institutunun önəmli olduğunu və MSK-nın seçkilərin keçirilməsində vacib rol oynadığını deyib.
Nümayəndə heyətinin rəhbəri ölkədəki seçkiqabağı vəziyyətlə maraqlanıb.
Sədr qonaqları ölkədəki seçkiqabağı durum barədə məlumatlandırmış və rəhbərlik etdiyi qurumun seçkilərin hazırlanıb keçirilməsi ilə bağlı gördüyü işlərdən danışmışdır. Vətəndaşların seçki hüququnun təmin edilməsi üçün lazımi işlərin görüldüyünü qeyd edən M.Pənahov ölkədəki seçki məntəqələrinin səsverməyə tam hazır vəziyyətə gətirilməsi üçün bütün qanuni addımların atıldığını diqqətə çatdırıb. O bildirmişdir ki, şəffaflığın təmin edilməsi məqsədi ilə müşahidəçilik üçün quruma müraciət edən şəxslərin hamısına müsbət cavab verilir. Komissiya sədri bildirib ki, ötən seçkilərin təcrübəsinə əsaslanaraq qarşıdan gələn seçkiləri on minlərlə müşahidəçinin izləyəcəyini ehtimal etmək olar.
Qonaqların suallarını cavablandıran M.Pənahov MSK-nın həyata keçirdiyi irimiqyaslı maarifləndirmə proqramı haqqında da ətraflı məlumat verib.
Missiyanın üzvləri ətraflı məlumata görə Mərkəzi Seçki Komissiyasının sədrinə təşəkkürlərini bildirib və qarşıdan gələn seçkilər ərəfəsində əməkdaşlıq imkanları barədə fikir mübadiləsi aparıblar.
Teqlər: