Qənimət Zahid Əli Kərimliyə necə atdı? – 175 minin davası

Qənimət Zahid Əli Kərimliyə necə atdı? – 175 minin davası
  13 Yanvar 2017    Oxunub:27998
AXCP sədri Əli Kərimli ilə onun “silahdaşı”, “Azadlıq” qəzetinin baş redaktoru Qənimət Zahid arasında münasibətlər pisləşib. Buna səbəb 175 min avro qrantın tərəflər arasında bərabər bölüşdürülməməsidir.

Məlumat üçün bildirək ki, Corc Sorosa bağlı donor təşkilatlardan biri layihə çərçivəsində “Azadlıq” qəzetinə 175 min avro qrant ayırıb. Ancaq, bu pulu Azərbaycana birbaşa çatdırmaq imkanı olmayan təşkilat həmin vəsaiti hazırda Fransada yaşayan Qənimət Zahidə ötürüb.

Dava da bundan sonra başlayıb. Qənimət Zahid pulu götürdükdən sonra Əli Kərimliyə düşən payı ona çatdırmayıb, əvəzində yeni layihəyə başlayıb. Səbəb kimi “Azadlıq” qəzetinin çapının bərpa olunmamasından narahatlığını və qəzetin saytının informasiya siyasətindən narazılığını göstərib. Q.Zahidin bu bəhanəsi cənab Kərimlini özündən çıxardıb və 175 min avronun geri alması üçün “Azadlıq” qəzetinin baş redaktorunun birinci müavini Rahim Hacıyevi yanvarın 5-də Fransaya göndərib. Bundan sonra tərəflər arasında qarşıdurma daha da şiddətlənib. Məlumata görə, vəziyyət o həddə çatıb ki, Rahim Hacıyevlə Qənimət Zahid pul üstündə əlbəyaxa olublar. Onları yalnız polis müdaxiləsindən sonra ayırmaq mümkün olub. Sonrada tərəflərin qrant məsələsində razılığa gəldiyi deyilir. Öz aralarında anlaşan Rahim Hacıyev və Qənimət Zahid gözlənildiyi kimi mətbuata verdikləri açıqlamalarda məlumatı təkzib ediblər.

Cəbhəçilərin bildirdiyinə görə, R.Hacıyev internet təhlükəsizliyi ilə bağlı təlimə qatılmaq üçün Fransada olub. Burada Q.Zahid deyib ki, aldığı pulu Ə.Kərimliyə verməyəcək. Çünki, o, bu pulu “Azadlıq” qəzetinə deyil, özünün və partiyanın xərclərinə sərf etmək niyyətindədir.

Q.Zahid ”Yeni Müsavat”a açıqlamasında isə “Azadlıq” qəzeti üçün qapı-qapı düşüb pul yığan Əli Kərimlinin yalanını üzə çıxarıb. Bildirib ki, “Azadlıq” qəzetinin çap variantı borca, maliyyə probleminə görə bağlanmayıb. Yəni, bu məsələ maliyyə problemi ilə bağlı deyil. Halbuki, başda Əli Kərimli olmaqla bütün cəbhəçilər “Azadlıq”ın maliyyə problemindən bağlandığını deyirdilər. Hətta Kərimli sosial şəbəkədə silsilə statuslar paylaşaraq qəzetin “xilası”na çağırışlar edirdi. Bu, bir daha onu göstərir ki, “Azadlıq”ın çapının dayandırılması Kərimlinin planıdır.

Sual oluna bilər ki, məqsəd nədir?

Kərimli bununla Azərbaycanda guya müxalif KİV-ə basqıların olduğunu, maddi yardımın edilmədiyinə dair görüntü yaratmaq istəyir. Özlüyündə yazıq və çarəsiz obraz yaradan Kərimli bununla xarici havadarlarından pul qoparmaq niyyətindədir.

Kərimlinin pul hərisliyi o həddə çatıb ki, yaxın ətrafı da ondan bezib. Cəbhəçilər gec də olsa, başa düşürlər ki, Kərimli AXCP və “Azadlıq” qəzetindən yalnız öz maraqları naminə istifadə edir, xaricdən gələn qrantları təkbaşına mənimsəyir.

Əli Kərimli ilə Qənimət Zahid arasında yaşanan 175 min avroluq qrant davasında narahat olan tərəflərdən biri də jurnalist Xədicə İsmayıldır. Həbsən çıxandan sonra Kərimli ilə yola getməyən Xədicə 175 min avro vəsaitin təyinatı üzrə xərclənmədiyini deyib.

Məlum olub ki, qrant verən qurumlara göndərilən hesabatda qəzet işçilərinə 1000-1500 avro maaşın verildiyi qeyd edilib. Halbuki, “Azadlıq”ın işçiləri aylarla maaş ala bilmədiklərindən şikayətlənirlər. Göründüyü kimi, Əli Kərimli jurnalistlərin də puluna göz dikməkdən belə çəkinmir.

Elvin Abdulqədirov
AzVision.az


Teqlər:  





Xəbər lenti