Jurnalistlər `ASAN Radio`nun qonağı oldu- FOTOLAR
"ASAN Radio"nun direktoru Emin Musəvi jurnalistlərə bildirib ki, Prezident İlham Əliyevin tapşırığı ilə yaradılan “ASAN Radio” 2015-ci il dekabrın 24-də yayıma başlayıb.
Direktor bildirib ki, dövlət xidmətləri sahəsində ixtisaslaşan ilk və yeganə radio olan “ASAN Radio” sosial, elm, idman, mədəniyyət və digər sahələrdə maraqlı, faydalı verilişlər hazırlayaraq dinləyicilərə təqdim edir:
“ “ASAN Radio” həm “ASAN xidmət” mərkəzlərində təmsil olunan, həm də digər dövlət qurumlarının xidmətləri barədə dinləyiciləri ətraflı məlumatlandırır, vətəndaşlarla dövlət qurumları arasında əlaqəni möhkəmləndirir. Xəbər istehsalçısı olan “ASAN Radio” məlumatları dinləyicilərə operativ şəkildə çatdırır. Radionun məqsədi xəbərin əsas mesajını 1-2 saat ərzində deyil, 2-3 dəqiqə ərzində çatdırmaqdır. Biz yeni üsullar əsasında işləyirik. Proqram və verilişlərə, xüsusi reportajlara və radioçarxlara üstünlük veririk. Biz özümüz də xəbər istehsal etməyə çalışırıq. “ASAN Radio” həm də gələcəyin media işçilərini yetişdirir. "ASAN könüllüləri" burada "Master-2" proqramı çərçivəsində təcrübə keçirlər, mediaya aid olan müxtəlif peşələri öyrənirlər. Onlar iş prosesində də iştirak edirlər. Artıq könüllülərin bir neçəsi "ASAN Radio"da işə götürülüb. Könüllülərlə bir yerdə radionun 30 nəfər əməkdaşı var".
E.Musəvi qeyd edib ki, “ASAN Radio” sosial mediada fəallığı ilə seçilir və internet üzərindən canlı efirlər, videoreportajlar yayımlayır:
"Radio Azərbaycan və dünya musiqisindən seçmələri dinləyicilərə təqdim edir. “ASAN Radio” beynəlxalq əlaqələr və radiokörpülər qurur, ölkəmizdə və beynəlxalq miqyasda keçirilən mötəbər tədbirləri canlı yayımlayır, sosial aksiyalarda iştirak edir. Müxtəlif dövlət qurumları, həmçinin bizneslərini inkişaf etdirən özəl strukturlar “ASAN Radio”nu etibarlı tərəfdaş olaraq seçir və təbliğat platformasından yararlanırlar. “ASAN Radio” Bakıda və Abşeron yarımadasında 100 FM tezliyində yayımlanır. Bundan başqa, radionu asanradio.az saytı vasitəsilə və xüsusi olaraq “ASAN Radio” üçün hazırlanan mobil tətbiqlərdən istifadə etməklə dinləmək mümkündür. Radionun dinləyici auditoriyası gündən günə genişlənir".
Anar Kəlbiyev
Foto:Elvin Abdulla
AzVision.az