AzVision.az-ın məlumatına görə, info-tur zamanı jurnalistlər “Gilan Qəbələ Konserv Zavodu”nun kartof çipsi, donmuş kartof friləri, limonad və meyvə suyu istehsal edən fabriklərinin iş mexanizmi ilə tanış olublar.

“Gilan Holding”in İnformasiya texnologiyaları və makina mühəndisi Ramazan Seyidov jurnalistlərə bildirib ki, Gilan Qida Şəhərciyində 2006-cı ildən meyvə suyu, 2014-cü ildən isə limonad və çipsi istehsalı fabrikləri işə başlayıb: “Hazırda hər üç zavodda 850 nəfər işçi çalışır. Şirkət tərəfindən ümumilikdə 37 adda məhsul satışa çıxarılır. 30-dan çox xarici ölkəyə isə məhsullar ixrac olunur.

2005-ci ildə əsası qoyulan “Gilan Qəbələ Konserv Zavodu”nun istehsal etdiyi məhsullar isə təkcə daxili bazarda deyil, həm də ABŞ, Yunanıstan, Almaniya, Rusiya, Ukrayna, Çin, Yaponiya, Avstraliya, Yeni Zellandiya, B.Ə.Ə, İran, Türkmənistan, Estoniya, Latviya, İtaliya və Fransa da daxil olmaqla müxtəlif ölkələrə ixrac olunur”.

Ümumi sahəsi 25 hektar olan Qəbələ Konserv Zavodunda təxminən 100 çeşid məhsul istehsal edilir və bu müəssisə İtaliya, İsveçrənin müasir və avtomatlaşdırılmış avadanlıqlarla təchiz olunub.

“Gilan Holding”in bazara çıxardığı daha bir brendi olan “Chipsim” markası barədə də məlumat verən R. Seyidovun sözlərinə görə, “Chipsim” markasının əsası 2013-cü ildə qoyulub. Hazırda paprika, şüyüdlü, klassik, pendirli, tomatlı, xama və soğanlı çeşidləri mövcuddur. Dondurulmuş kartof istehsalı fabrikində isə “Alma dilimi” adlı kartof friləri istehsal olunur. Kartof emalı bölümündə beynəlxalq TUV AUSTRİA İSO-22000:2005 FSSC, İSO-22761:2007 GMP, uyğunluq və gigiyenik sertifikatları alınıb.

Zavodun kartof emalı müəssisəsinin sahə rəhbəri Əliismayıl Cəfərovun sözlərinə görə zavodda “Lediikleer Fasan” ve “Ledirozetta” kartof sortlarından çipsi istehsalı üçün, “Allegriya” sortundan isə donmuş kartof istehsalında istifadə edilir: “Hazırda zavodumuz tərəfindən kartof emalında Almaniya ve Hollandiyada yetişdirilmiş kartof sortlarından istifadə edilir. Bundan başqa, Qəbələ rayonun da dağlıq zona olması və əlverişli iqlim şəraiti də imkan verir ki, müəssisə ilboyu öz yerli məhsullarından dadlı ve keyfiyyətli Çipsi ve Fri məhsullarını istehsal edərək daxili bazarın eksportdan aslılığını aradan qaldırsın. “Gilan Qəbələ Konserv Zavodu”nun Xanlar rayonu, Qəbələnin Qaş bölgəsində, Goranboy, Samuxda da özünəməxsus kartof sahələri var”.

Cəfərov əlavə edib ki, zavodda Çipsi istehsalı xətti üzrə saatda 1 ton hazır məhsul istehsal olunur, bu da gün ərzində 8 saatlıq iş rejimi üçün 8 ton deməkdir: “ Fri istehsalı sahəsində isə saatda 3 ton məhsul emal olunur. Çipsi istehsalı zamanı kartofun anbarda nəql olmağa başlamağı ilə paketə yığılması arasında təxminən 45-50 dəqiqə vaxt keçir. Hazırda zavodun istehsal etdiyi çipsilərin 20, 75, 150 qramlıq paketləri satışa çıxarılır. Paketlərin yararlılıq müddəti isə 6 aydır”.

Qeyd edək ki, “Gilan Holding”in meyvə emalı müəssisəsi 2006-c ildə istehsala başlayıb və qısa müddətdə bazarın böyük hissəsini sahiblənib. Zavod 5000 tonluq hazır məhsul saxlanma anbarı və yarımfabrikat soyuducu anbarlara təchiz olunub.

“Qəbələ Konserv Zavodun”un meyvə suyu istehsalı bölümündə beynəlxalq TUV AUSTRİA İSO-22000:2005 FSSC, İSO-9001:2005 ,ECOCERT-orqanik ,kosher, uyğunluq və gigiyenik sertifikatlar, limonad istehsalı bölümündə isə beynəlxalq TUV AUSTRİA İSO-22000:2005 FSSC, İSO-9001:2005, uyğunluq və gigiyenik sertifikatlar alınıb.

Qeyd edək ki, dünyanın ən son müasir texnoloji avadanlıqları ilə təchiz olunmuş bu zavodda meyvə suyu istehsalı üçün saatda 25 min ədəd şüşə vura bilən İtaliyanın və İsveçrənin müştərək şirkətlərinin xətləri quraşdırılıb. Meyvə suyu istehsalı sahəsində məhsulların istehsalı və saxlanılması beynəlxalq standartlara uyğun şəkildə aparılaraq xüsusi testlərdən keçirilir, daha sonra daxili və xarici bazarlarda satışa çıxarılır.

Seyidovun sözlərinə görə, zavod ehtiyacı olan albalı məhsulunu İrandan, bananı Braziliyadan, portağalı konsentrant formasında əsasən Afrikadan alır. Yerli məhsullardan isə ən çox nar və alma alınır. “Gilan Holding”in yeni layihəsi haqda da jurnalistləri məlumatlandıran Seyidov bildirib ki, zavod artıq pepsi məhsulu da istehsal edəcək: “Pepsi istehsalı üçün artıq Pepsi-CO İnternational”dan xüsusi lisenziya da alınıb. İstehsal olunan “Pepsi”lər hələ ki ilkin olaraq yarım litr həcmində olacaq və bazar qiyməti ilə eyni satılacaq”.

Zavodun laborator fəaliyyətindən söz açan “Gilan Holding”in keyfiyyətə nəzarət müdiri Kamil İsmayılovun sözlərinə görə, laboratoriya analizləri məhsulun istehsalına başlayandan sona qədər davam edir: “ Məhsulların saxlanma müddəti onların çeşidlərinə görə dəyişir. Çipsilər üçün 6 ay, kartof friləri üçün isə bir il yarım müddət nəzərdə tutulur”.

Avropanın bir çox ölkələrinə - ABŞ, Hollandiya, Çin, Gürcüstan da daxil MDB ölkələrinin hər birinə, Türkiyəyə məhsul ixracını gerçəkləşdirən “Gilan Holding”in istehsal etdiyi çipsilər hələki ölkədaxili tələbatı qarşılayır. Gələcəkdə isə ixrac üçün də istehsalı gözlənilir.

Son olaraq “Gilan Holding”in “Açıq qapı” kampaniyasından söz açan R. Seyidov vurğulayıb ki, “Gilan Holding” Qida Şəhərciyi olaraq qida sənayesində yeganə şirkətdir ki, istər təşkilat, istər universitet, istər məktəblər üçün “Açıq qapı” günü elan edib. Artıq 2011-ci ildən bu kampaniyaya start verən şirkətə istənilən şəxs gələrək istehsal prosesi ilə yaxından tanış ola bilər.

Eldar Tanrıverdiyev
AzVision.az

Qalereya