Bunu AzVision.az-a açıqlamasında Nardaranın deputatı Eldar Quliyev bildirib.

Millət vəkili qeyd edib ki, Taleh Bağırov və onun ətrafında olan insanlar hakimiyyətə qarşı çevriliş plan; hazırlayırmışlar. “Onlar istəyirdilər ki, Azərbaycanda şəriət dövləti olsun. Axı, siz kimsiniz, belə bir tələb irəli sürürsünüz? Taleh Bağırov həbsdən çıxandan sonra çirkin əməllərindən əl çəkmədi. Başladı işsiz, bekar gəncləri ətrafına yığmaya. Onlar dərk etmirdilər ki, Azərbaycan demokratik, hüquqi dövlətdir və ölkəmizdə ictimai-siyasi sabitlik var”.

Deputat əlavə edib ki, Taleh Bağırov özünü dindar kimi qələmə versə də, o, xarici ölkələrin agentidir. Onun missiyası Azərbaycanda qarışıqlıq yaratmaq olub.

“Bunlar açıq şəkildə dövlətə qarşı silahlı qarşıdurma hazırlayırdılar. Biz qətiyyətlə bu hadisəni pisləyirik. Dövlətdən xahiş edirik ki, Talehə və onun ətrafında olanlara qarşı ən sərt cəza tədbirləri görülsün. Burada söhbət tək nardaranlılardan getmir, bu gün Gəncədə və Lənkəranda da belə xoşagəlməz hadisələr yaşanır. Aidiyyatı qurumlar ehtiyatlı olmalı, onların təxribat cəhdlərinin qarşısı alınmalıdır. Onlar o qədər təhlükəli insanlardır ki, hər şey gözləmək olar”.

E.Quliyev Taleh Bağırovun bahalı maşınlarda gəzməsinə diqqət çəkib: “Özü bahalı maşınlarda gəzir. Həmçinin 3-4 maşın onu müşayiət edir. O kimdir axı? Hansı vəzifənin sahibidir? Kənddə Taleh Bağırov cangüdənlərlə gəzirdi. Millət vəkili olaraq mənim elə səlahiyyətim yoxdur. Onda bu pullar, maşınlar haradan? Əgər o, özbaşınadırsa, bunları necə edə bilər? Demək ki, haradansa maliyyə gəlir. Xaricdən aldığı pullarla gəncləri ətrafına yığır. Bunlar da təbliğata tez uyanlardır”.

Anar Kəlbiyev