KİVDF-dən verilən məlumata görə, müsabiqədə ən azı 1 il müddətində fəaliyyət göstərən kütləvi informasiya vasitələri (televiziya kanalları, qəzetlər, jurnallar, informasiya agentlikləri və internet informasiya resursları) iştirak edə bilərlər.

Mətbuat Şurasının tərtib etdiyi "qara siyahı”ya düşmüş KİV-in müsabiqədə iştirakına icazə verilmir. Müsabiqənin maliyyələşdirilməsi qaydaları Fondun Müşahidə Şurası tərəfindən müəyyənləşdiriləcək. Mövzunun KİV-lər tərəfindən əhatə olunması səviyyəsini müəyyənləşdirmək üçün Fondun Müşahidə Şurası tərəfindən xüsusi Monitorinq Qrupu yaradılıb.

Müsabiqənin qiymətləndirmə meyarları aşağıdakılardır:

- mövzunun əhatə olunması, idman yarışlarının işıqlandırılması, jurnalist təhlili;
- fəaliyyətin cəmiyyət üçün informasiyalılıq səviyyəsi;
- jurnalist obyektivliyi, qərəzsizliyi, tərəfsizliyi və məsuliyyəti;
- ictimai maraqların müdafiəsi.

I -ci yerin qalibi 30 min, II -ci yerin qalibi 15 min, III -cü yerin qalibi isə 10 min manat məbləğində mükafat qazanacaq. Nəticələri yüksək qiymətləndirilmiş KİV-lər Müşahidə Şurasının qərarı ilə Fondun İcraçı direktoru tərəfindən təsdiq edilir. Müsabiqənin yekunları haqqında iştirakçılara və ictimaiyyətə məlumat verilir.

Müsabiqə bu gündən başlayaraq iyulun 1-dək davam edəcək.